اسلام آباد: انکم ٹیکس گوشوارے جمع کرانے کی تاریخ میں توسیع کے حوالے سے ایف بی آر حکام کا اہم بیان سامنے آگیا۔
تفصیلات کے مطابق انکم ٹیکس گوشوارے جمع کرانے کی آج آخری تاریخ ہے ، فیڈرل بورڈ آف ریونیو (ایف بی آر) حکام نے کہا ہے کہ انکم ٹیکس گوشوارے جمع کرانے کی تاریخ میں مزید توسیع نہیں ہوگی، اب تک 50 لاکھ 10 ہزار سے زائد گوشوارے جمع ہوچکے ہیں۔
حکام کا کہنا تھا کہ انکم ٹیکس گوشواروں سے 125 ارب سے زائد کی رقم جمع ہوچکی ہے، گوشوارے آج رات 12 بجے تک جمع کیے جاسکتے ہیں۔
ایف بی آر نے کہا کہ یکم نومبر سے گوشوارے جمع کرانے والے لیٹ فائلر یا نان فائلر بن جائیں گے، لیٹ فائلرز پر گاڑی اور پراپرٹی خریدنے پر دگنا ٹیکس ہوگا۔
حکام کا مزید کہنا تھا کہ ماہانہ 50 ہزار آمدن والوں کے لیے انکم ٹیکس کا گوشوارہ جمع کرانا لازمی ہے، ماہانہ 50 ہزار آمدن پر گوشوارہ جمع نہ کرانے والا نان فائلر یا لیٹ فائلر قرار دیا جائے گا۔
حکام نے بتایا کہ نان فائلرز کے بیرون ملک جانے پر پابندی عائد کی جائے گی، موبائل فون سم بلاک کی جائیں گی، ساتھ ہی بجلی اور گیس کے بل منقطع کیے جائیں گے۔
