اسلام آباد: ترجمان دفتر خارجہ شفقت علی خان نے کہا ہے کہ پاکستان کی ون چائنہ سے متعلق پالیسی تبدیل نہیں ہو گی۔
ترجمان دفتر خارجہ شفقت علی خان نے ہفتہ وار بریفنگ میں کہا کہ چین پاکستان کا دوست ملک ہے۔ اور پاکستان ون چائنہ پالیسی پر عمل پیرا ہے۔ پاکستان کی ون چائنہ سے متعلق پالیسی تبدیل نہیں ہو گی۔
انہوں نے کہا کہ پاک چین دوستی کے حوالے سے بےبنیاد الزامات لگائے گئے۔ اور پاک چین دوستی کو متاثر کرنے کی کوشش کی مذمت کرتے ہیں۔ پاکستان اور چین کے درمیان بہترین تعلقات ہیں۔
شفقت علی خان نے کہا کہ پاکستان ہر قسم کی دہشت گردی کی مذمت کرتا ہے۔ اور سوڈان میں بھی دہشت گردی کے واقعے کی مذمت کرتے ہیں۔
مراکش میں کشتی حادثے کے حوالے سے بات کرتے ہوئے انہوں نے کہا کہ مراکش کشتی حادثے سے متعلق تحقیقات جاری ہیں۔ اور مراکش کشتی حادثے میں بچ جانے والے افراد کو پاکستان لایا جا رہا ہے۔ پاکستان میں امن مشقوں کا انعقاد ہونے جا رہا ہے۔
گزشتہ روز ترجمان دفتر خارجہ کا اپنے ایک بیان میں کہنا تھا کہ افغانستان میں امریکی جدید ہتھیاروں کی موجودگی پاکستان اور اس کے شہریوں کے تحفظ اور سلامتی کے لیے گہری تشویش کا باعث ہے۔
ان کا کہنا تھا کہ اگست 2021 میں امریکی افواج کے افغانستان سے انخلا کے بعد وہ جدید ترین ہتھیار وہیں چھوڑ گئے تھے۔ ان جدید ہتھیاروں کو کالعدم تنظیمیں پاکستان میں دہشتگردانہ حملے کرنے کے لیے استعمال کر رہی ہے۔ کابل میں عبوری حکام سے کئی بار مطالبہ کیا تھا کہ وہ تمام ضروری اقدامات کریں تاکہ یہ یقینی بنایا جا سکے کہ یہ ہتھیار غلط ہاتھوں میں نہ جائیں۔
