کرکٹ دنیا کے سب سے بڑے کھیلوں کے میلے اولمپکس میں 128 سال بعد شاندار واپسی کر رہا ہے۔ لاس اینجلس میں ہونے والے 2028 کے اولمپک کھیلوں میں کرکٹ کے مقابلے 12 سے 29 جولائی تک منعقد ہوں گے، جس میں مردوں اور خواتین کی 6،6 ٹیمیں حصہ لیں گی۔
اولمپکس انتظامیہ نے کھیلوں سے ٹھیک تین سال قبل مقابلوں کے شیڈول کا اعلان کر دیا ہے۔ کرکٹ کے مقابلے دو مراحل میں کھیلے جائیں گے – پہلا مرحلہ 12 سے 18 جولائی جبکہ دوسرا مرحلہ 22 سے 28 جولائی تک ہوگا۔ فائنل میچ 29 جولائی کو کھیلا جائے گا، تاہم مردوں اور خواتین کے مقابلوں کی ترتیب کے حوالے سے ابھی حتمی فیصلہ نہیں ہو سکا۔
تمام کرکٹ میچز لاس اینجلس کے پامونا علاقے میں واقع فیئر گراؤنڈز کرکٹ سٹیڈیم میں منعقد ہوں گے۔ اولمپکس کی افتتاحی تقریب 14 جولائی جبکہ اختتامی تقریب 30 جولائی کو ہوگی۔
بین الاقوامی کرکٹ کونسل (آئی سی سی) 17 سے 20 جولائی کے درمیان سنگاپور میں ہونے والے اپنے اجلاس میں کوالیفکیشن کے طریقہ کار پر حتمی فیصلہ کرے گی۔ ابتدائی معلومات کے مطابق ٹیموں کی شمولیت آئی سی سی کی موجودہ رینکنگ کی بنیاد پر طے کی جا سکتی ہے۔
یہ کرکٹ کی اولمپک تاریخ میں دوسرا موقع ہوگا جب یہ کھیل اولمپکس کا حصہ بنے گا۔ اس سے قبل 1900 کے پیرس اولمپکس میں کرکٹ کھیلا گیا تھا، جس میں صرف دو ٹیموں (برطانیہ اور فرانس) نے حصہ لیا تھا۔ لاس اینجلس 2028 میں کرکٹ کی شمولیت کو کھیل کی عالمی پذیرائی میں ایک اہم سنگ میل قرار دیا جا رہا ہے۔
کھیلوں کے ماہرین کے مطابق اولمپکس میں کرکٹ کی شمولیت سے نہ صرف کھیل کی عالمی مقبولیت میں اضافہ ہوگا، بلکہ یہ کرکٹ کے فروغ کے لیے بھی ایک اہم موقع ثابت ہوگا۔ اب تمام نظریں آئی سی سی کے سنگاپور اجلاس پر ہیں جہاں کوالیفکیشن کے طریقہ کار پر حتمی فیصلہ کیا جائے گا۔
