پنجاب اور خیبرپختونخوا کی صوبائی اسمبلیوں میں سینیٹ کے انتخابات کے لیے آج ووٹنگ کا عمل جاری ہے۔ خیبرپختونخوا میں کل 11 نشستوں پر 22 امیدوار مقابلہ کر رہے ہیں، جن میں 7 جنرل، 2 خواتین اور 2 ٹیکنوکریٹ نشستیں شامل ہیں۔ سیاسی تجزیہ کاروں کے مطابق 6 نشستیں حکمران جماعتوں جبکہ 5 اپوزیشن کے حصے میں آنے کا امکان ہے۔
پنجاب اسمبلی میں سابق سینیٹر ساجد میر کی وفات کے باعث خالی ہونے والی ایک نشست پر ضمنی انتخاب ہو رہا ہے، جس کے لیے مسلم لیگ (ن) کے حافظ عبدالکریم، اپوزیشن کے مہر عبدالستار اور دو آزاد امیدوار میدان میں ہیں۔ پولنگ شام 4 بجے تک جاری رہے گی۔
خیبرپختونخوا اسمبلی میں کل 145 ارکان میں سے 92 حکومتی جبکہ 53 اپوزیشن ارکان ووٹ ڈالیں گے۔ گزشتہ روز صوبائی اسمبلی کی مخصوص نشستوں پر منتخب ہونے والے 25 ارکان نے حلف اٹھایا، جن میں 21 خواتین اور 4 اقلیتی نمائندے شامل تھے۔
انتخابی عمل کے دوران سکیورٹی کے سخت انتظامات کیے گئے ہیں۔ دونوں صوبائی اسمبلی ہالز کو پولنگ اسٹیشنز میں تبدیل کیا گیا ہے۔ سیاسی مبصرین کے مطابق یہ انتخابات وفاقی حکومت اور اپوزیشن کے درمیان طاقت کے توازن کو متاثر کر سکتے ہیں۔ نتائج کا انتظار سیاسی حلقوں سمیت عام شہریوں کی توجہ کا مرکز بنا ہوا ہے۔
