صوبائی محتسب نے ایک اہم اور غیر معمولی قدم اٹھاتے ہوئے کے الیکٹرک کے چیف ایگزیکٹو آفیسر (سی ای او) مونس علوی کو فوری طور پر عہدے سے ہٹانے اور ان پر 25 لاکھ روپے کا بھاری جرمانہ عائد کرنے کا حکم دیا ہے۔ یہ فیصلہ کراچی کی رہائشی صارف مہرین زہرہ کی جانب سے دائر کردہ شکایت کی سماعت کے بعد سنایا گیا، جس میں مونس علوی کے خلاف متعدد الزامات کی تحقیقات کی گئیں۔
صوبائی محتسب کی جانب سے جاری کردہ تحریری فیصلے میں کہا گیا ہے کہ مونس علوی پر عائد الزامات درست ثابت ہوئے، لہٰذا انہیں فوری طور پر سی ای او کے عہدے سے برطرف کیا جائے اور ان پر مالی جرمانہ بھی عائد کیا جائے۔
یہ فیصلہ ایسے وقت پر سامنے آیا ہے جب کے الیکٹرک کے بورڈ آف ڈائریکٹرز نے رواں ماہ ہی مونس علوی کو دوبارہ سی ای او مقرر کرنے کا اعلان کیا تھا۔ بورڈ کی جانب سے 7 جولائی 2025 کو ہونے والے اجلاس میں یہ طے پایا تھا کہ سید مونس عبداللہ علوی کو 30 جولائی سے دوبارہ چیف ایگزیکٹو آفیسر کے عہدے پر فائز کیا جائے گا، جس کا باقاعدہ اعلان کے الیکٹرک کی جانب سے جاری کردہ پریس ریلیز میں کیا گیا تھا۔
مونس علوی 2008 سے کے الیکٹرک کے ساتھ وابستہ ہیں اور وہ کمپنی میں مختلف اہم عہدوں پر اپنی خدمات سرانجام دے چکے ہیں، جن میں چیف فنانشل آفیسر، کمپنی سیکرٹری اور ہیڈ آف ٹریژری جیسے مناصب شامل ہیں۔
