ڈیل نہیں، عدالتی جنگ سے رہائی ممکن بنائیں گے، عمران خان ہر حال میں آزاد ہوں گے: بیرسٹر گوہر

پاکستان تحریک انصاف کے چیئرمین بیرسٹر گوہر نے دوٹوک انداز میں اعلان کیا ہے کہ عمران خان کی رہائی کسی بھی ڈیل یا مفاہمت کا نتیجہ نہیں ہوگی بلکہ وہ قانونی اور عدالتی جنگ کے ذریعے آزادی حاصل کریں گے۔ انہوں نے اس عزم کا اظہار کیا کہ اب تحریک انصاف کا ہر قدم عمران خان کی رہائی کو یقینی بنانے کی جانب ہوگا، اور ہم اس مقصد کو حاصل کیے بغیر پیچھے نہیں ہٹیں گے۔

میڈیا سے گفتگو کرتے ہوئے بیرسٹر گوہر نے کہا کہ 5 اگست کو عمران خان کو جیل میں دو سال مکمل ہو جائیں گے، تاہم اس طویل قید کے باوجود ان کی ہمت اور حوصلے میں ذرہ برابر بھی کمی نہیں آئی، اور وہ آج بھی اُسی جرأت اور استقلال کے ساتھ کھڑے ہیں جس طرح وہ پہلے دن تھے۔ انہوں نے واضح کیا کہ عمران خان تحریک انصاف کے بانی، قائد اور رہنما تھے، ہیں اور ہمیشہ رہیں گے، اور کسی صورت پارٹی کو ختم نہیں کیا جا سکتا۔

بیرسٹر گوہر نے اداروں اور عدلیہ پر عوام کے اعتماد میں کمی پر بھی تشویش کا اظہار کرتے ہوئے کہا کہ اگر ملک کو ترقی کی راہ پر گامزن کرنا ہے تو سیاسی انتقام اور جبر کے اس تسلسل کو ختم کرنا ہوگا۔ انہوں نے زور دے کر کہا کہ تحریک انصاف ریاست کی مضبوطی، جمہوریت کے فروغ اور عدلیہ کی آزادی کی علمبردار ہے۔

اس موقع پر انہوں نے یہ بھی بتایا کہ آج 5 اگست کو عمران خان کی رہائی کے لیے ملک بھر میں یونین کونسل کی سطح پر پُرامن احتجاجی مظاہرے کیے جائیں گے تاکہ عوامی سطح پر ان کی رہائی کا مطالبہ اجاگر کیا جا سکے۔