پنجاب بھر میں اسکولوں کی گرمیوں کی چھٹیوں میں 31 اگست تک توسیع دینے پر غور کیا جا رہا ہے۔ ذرائع کے مطابق، لاہور سمیت صوبے کے دیگر شہروں میں تعطیلات ختم ہونے کا وقت قریب آ چکا ہے، لیکن اب تک 15 اگست سے اسکول دوبارہ کھولنے کے حوالے سے کوئی حتمی فیصلہ سامنے نہیں آیا۔
محکمہ اسکول ایجوکیشن پنجاب کی جانب سے شدید گرمی اور حبس کے باعث اسکولوں کی تعطیلات میں ممکنہ توسیع پر غور کیا جا رہا ہے۔ اس سلسلے میں متعلقہ حکام کا کہنا ہے کہ موجودہ موسم بچوں کی صحت کے لیے نقصان دہ ثابت ہو سکتا ہے، اس لیے فیصلہ موسم کی صورتحال کا جائزہ لینے کے بعد ہی کیا جائے گا۔
صوبائی وزیر تعلیم رانا سکندر حیات نے اس حوالے سے وضاحت کرتے ہوئے کہا ہے کہ گرمیوں کی چھٹیوں سے متعلق کوئی بھی حتمی اعلان والدین، ماہرین، محکمہ موسمیات اور دیگر متعلقہ اداروں سے مشاورت کے بعد ہی کیا جائے گا۔ ان کے مطابق موسم کی شدت کے پیش نظر بہت جلد حتمی فیصلہ سامنے آ سکتا ہے۔
یاد رہے کہ پنجاب حکومت نے رواں برس 28 مئی سے 14 اگست تک موسم گرما کی تعطیلات کا اعلان کیا تھا، اور تمام اسکولوں کو 15 اگست سے دوبارہ کھولنے کی ہدایت جاری کی گئی تھی۔
دوسری جانب سندھ اور بلوچستان میں تعلیمی سرگرمیاں یکم اگست سے بحال ہو چکی ہیں۔ سندھ میں اسکولوں کی تعطیلات یکم جون سے 31 جولائی تک مقرر کی گئی تھیں، جس کے بعد سرکاری اسکولز یکم اگست جبکہ بیشتر نجی اسکولز 4 اگست سے کھل چکے ہیں۔
