دبئی میں یومِ آزادی پاکستان کے موقع پر ایک شاندار اور رنگا رنگ تقریب کا انعقاد کیا گیا، جس میں پاکستان سے محبت کرنے والے ہزاروں افراد نے بھرپور جوش و خروش کے ساتھ شرکت کی۔ اس عظیم الشان پروگرام میں شرکاء کی تعداد 60 ہزار سے تجاوز کر گئی، جو دبئی میں پاکستانی کمیونٹی کی والہانہ محبت اور وطن سے گہری وابستگی کا ثبوت ہے۔
تقریب کے دوران پاکستانی ملی نغموں کی گونج نے ماحول کو مزید پرجوش بنا دیا، جبکہ حاضرین نے قومی پرچم لہرائے اور پاکستان کے حق میں نعرے بلند کیے۔ یہ جشن نہ صرف پاکستان کی آزادی کی خوشی کا عکاس تھا بلکہ دونوں ممالک کے درمیان دوستی اور بھائی چارے کی علامت بھی بن گیا۔
اس یادگار موقع پر متحدہ عرب امارات کے وزیر برائے رواداری و بقائے باہمی شیخ نہیان بن مبارک آل نہیان نے خصوصی طور پر شرکت کی۔ انہوں نے پاکستانی کمیونٹی کو متحدہ عرب امارات کی ترقی میں بھرپور کردار ادا کرنے پر خراجِ تحسین پیش کیا اور دونوں ممالک کے درمیان مضبوط تعلقات کو سراہا۔
