صدرِ مملکت آصف علی زرداری اور وزیراعظم شہباز شریف نے اقلیتوں کے قومی دن کے موقع پر اپنے علیحدہ علیحدہ پیغامات جاری کرتے ہوئے کہا ہے کہ پاکستان میں بسنے والے ہر شہری کو اس کے عقیدے اور مذہب کے مطابق زندگی گزارنے کا مکمل اور بلا خوف و خطر حق حاصل ہے۔ دونوں رہنماؤں نے زور دیا کہ ریاست تمام شہریوں کو برابری کے مواقع فراہم کرنے اور مذہبی آزادی کے تحفظ کے لیے پرعزم ہے۔
صدر آصف علی زرداری نے اپنے پیغام میں کہا کہ دینِ اسلام اقلیتوں کے حقوق کے تحفظ کو نہ صرف تسلیم کرتا ہے بلکہ اس کی مکمل ضمانت بھی دیتا ہے۔ انہوں نے کہا کہ پاکستان کی سماجی اور اقتصادی ترقی میں اقلیتی برادری کے مثبت کردار کے اعتراف کے طور پر ہر سال یہ دن منایا جاتا ہے۔ ان کا کہنا تھا کہ ہم قائداعظم محمد علی جناح کے 11 اگست 1947ء کو اقلیتوں سے کیے گئے وعدے پر قائم ہیں اور آئینِ پاکستان میں درج تمام سیاسی، معاشی اور سماجی حقوق اقلیتوں کو بلا امتیاز حاصل ہیں۔
صدرِ مملکت نے مزید بتایا کہ سرکاری ملازمتوں میں اقلیتوں کے لیے 5 فیصد کوٹہ مختص ہے، پارلیمنٹ کے دونوں ایوانوں میں ان کی نمائندگی کے لیے نشستیں موجود ہیں، اقلیتی طلباء کے لیے وظائف کی فراہمی اور ان کی عبادت گاہوں کی مرمت و دیکھ بھال کے لیے فنڈز مختص کیے گئے ہیں۔ انہوں نے کہا کہ پاکستان میں ہر شہری کو مذہب، ذات، رنگ یا نسل کی بنیاد پر کسی امتیاز کے بغیر زندگی گزارنے کا حق حاصل ہے اور ریاست اقلیتوں کو ترقی کے مساوی مواقع فراہم کرنے کے لیے پُرعزم ہے۔
اس موقع پر وزیراعظم شہباز شریف نے اپنے پیغام میں کہا کہ اقلیتوں کے قومی دن کے موقع پر میں پاکستان میں بسنے والی تمام اقلیتوں کو نیک خواہشات پیش کرتا ہوں اور ملکی ترقی و خوشحالی میں ان کے شاندار کردار کو خراج تحسین پیش کرتا ہوں۔ انہوں نے کہا کہ سرکاری سطح پر یہ دن منانے کا مقصد اقلیتی برادری کے ساتھ اظہار یکجہتی اور ریاستِ پاکستان کے لیے ان کی خدمات کو تسلیم کرنا ہے۔ وزیراعظم نے یاد دلایا کہ ہماری اقلیتی برادری نے تحریکِ پاکستان میں بھی ایک اہم اور کلیدی کردار ادا کیا تھا۔
شہباز شریف نے کہا کہ قائداعظم محمد علی جناح نے 11 اگست 1947ء کو آئین ساز اسمبلی میں اپنی تاریخی تقریر کے دوران اقلیتوں کے لیے مکمل مذہبی آزادی کا اعلان کیا تھا۔ انہوں نے اس عزم کا اعادہ کیا کہ حکومت پاکستان اقلیتوں کے حقوق کے تحفظ اور ان کی ترقی و خوشحالی کے لیے عملی اقدامات جاری رکھے گی۔
