کراچی میں حالیہ بارش نے موسم کو خوشگوار بنا دیا ہے جبکہ محکمہ موسمیات نے آئندہ تین سے چار روز تک شہر قائد میں مزید تیز بارشوں کی پیش گوئی کی ہے۔ محکمہ موسمیات کے مطابق آج دن بھر وقفے وقفے سے بارش کا سلسلہ جاری رہے گا اور کل بھی موسلا دھار بارش کا امکان ظاہر کیا گیا ہے۔
شہر کے مختلف علاقوں میں صبح سویرے سے بارش کا سلسلہ جاری ہے۔ طارق روڈ، عزیز آباد، شارعِ قائدین، بوٹ بیسن، لیاقت آباد، ناظم آباد، حسن اسکوائر اور فیڈرل بی ایریا میں بارش ریکارڈ کی گئی۔ اسی طرح ایئرپورٹ، میٹرول پول، شاہ فیصل، کورنگی، بفرزون، سرجانی، کلفٹن، ڈیفنس، قیوم آباد، شارع فیصل، اسکیم 33، صفورا چورنگی اور ملیر سمیت کئی مقامات پر بارش نے شہریوں کو خوشگوار حیرت میں مبتلا کر دیا۔
مزید برآں قائد آباد، کورنگی، شاہ فیصل کالونی، ماڈل کالونی، گرین ٹاؤن، وائرلیس گیٹ، کالونی گیٹ، گرومندر، نیا ناظم آباد، ڈی ایچ اے اور لیاری جیسے علاقوں میں بھی بارش کا سلسلہ وقفے وقفے سے جاری ہے۔ محکمہ موسمیات نے خبردار کیا ہے کہ بارش کے باعث کئی سڑکوں پر پانی جمع ہو گیا ہے جس سے ٹریفک کی روانی متاثر ہو سکتی ہے۔
محکمہ موسمیات کے مطابق موجودہ سسٹم 23 اگست تک برقرار رہنے کا امکان ہے جس کے دوران شہر بھر میں 2 سے 3 اسپیل بارش کے آ سکتے ہیں۔ شہریوں کو مشورہ دیا گیا ہے کہ وہ غیر ضروری سفر سے گریز کریں اور احتیاطی تدابیر اختیار کریں۔
