پنجاب حکومت نے گزشتہ روز فرائض کی انجام دہی کے دوران جاں بحق ہونے والے اسسٹنٹ کمشنر پتوکی فرقان احمد خان کی خدمات کے اعتراف میں انہیں اعلیٰ سول ایوارڈ دینے کا فیصلہ کیا ہے۔ اس کے ساتھ ہی ان کے اہلِ خانہ کے لیے ایک کروڑ روپے کی مالی معاونت کا اعلان بھی کیا گیا ہے۔
میڈیا رپورٹس کے مطابق وزیراعلیٰ پنجاب مریم نواز نے مرحوم فرقان احمد خان کے لیے ایوارڈ اور مالی امداد کی منظوری دی ہے۔ فرقان احمد کینسر کے مرض میں مبتلا ہونے کے باوجود مسلسل فلڈ ریلیف آپریشنز میں حصہ لیتے رہے اور پتوکی کے سیلاب متاثرہ علاقوں میں خوراک، دوائی اور دیگر سہولیات پہنچانے میں بھرپور کردار ادا کیا۔
وزیراعلیٰ نے کہا کہ مرحوم اسسٹنٹ کمشنر نے انتہائی مشکل حالات میں عوام کی خدمت کرتے ہوئے اپنی جان کا نذرانہ پیش کیا اور وہ حقیقی ہیرو ہیں۔ انہوں نے مزید کہا کہ فرقان احمد کی فرض شناسی اور قربانی ہمیشہ یاد رکھی جائے گی۔
واضح رہے کہ گزشتہ روز ضلع قصور میں ہیڈ بلوکی کے سیلاب متاثرہ علاقوں کے دورے کے دوران فرقان احمد کو دل کا دورہ پڑا جو جان لیوا ثابت ہوا۔ وہ اس وقت سیلاب متاثرین کی بحالی اور ریسکیو سرگرمیوں میں مصروف تھے۔
