بالی ووڈ کے سپر اسٹار شاہ رخ خان کی صاحبزادی سہانا خان ایک متنازعہ زرعی اراضی کی خریداری کے معاملے میں قانونی مشکلات کا سامنا کر رہی ہیں۔ بھارتی میڈیا رپورٹس کے مطابق سہانا خان نے ممبئی کے مشہور علاقے علی باغ میں زرعی زمین خریدی، اور اس لین دین کے دوران تیار کی جانے والی دستاویزات میں انہیں مبینہ طور پر ’’کسان‘‘ ظاہر کیا گیا ہے۔
تفصیلات کے مطابق سہانا خان نے تقریباً 12 کروڑ 91 لاکھ روپے مالیت کی اس زمین کو تین بہنوں، انجلی، ریکھا اور پریا سے خریدا، جو ان کی وراثتی جائیداد تھی۔ خریداری کے بعد سے ہی یہ معاملہ تنازعے کا شکار ہے اور اب قانونی پہلوؤں کے تحت اس پر سوالات اٹھائے جا رہے ہیں۔
مزید یہ بھی بتایا گیا ہے کہ سہانا خان نے علی باغ میں دو قیمتی پلاٹس خریدے جن کی مجموعی مالیت 22 کروڑ روپے بنتی ہے۔ یہ پلاٹس 2023 اور 2024 کے دوران خریدے گئے تھے اور انہیں ’’دیجاوو فارم پرائیویٹ لمیٹڈ‘‘ کے نام پر رجسٹرڈ کیا گیا ہے۔ یہ کمپنی شاہ رخ خان کی اہلیہ گوری خان کی والدہ اور بھابھی کی ملکیت ہے۔
رپورٹس کے مطابق زمین کی خریداری کے وقت دستاویزات میں سہانا کو کسان ظاہر کیا جانا اب ان کے لیے بڑا قانونی چیلنج بن گیا ہے، کیونکہ مقامی قوانین کے مطابق زرعی زمین کی ملکیت اور استعمال سے متعلق سخت ضوابط موجود ہیں، جن کی خلاف ورزی کی صورت میں مقدمہ یا قانونی کارروائی کا سامنا کرنا پڑ سکتا ہے۔
