امریکا کے صدر ڈونلڈ ٹرمپ نے بھارتی وزیراعظم نریندر مودی کو واضح پیغام دیتے ہوئے کہا ہے کہ پاکستان کے ساتھ جنگ کسی صورت نہیں ہونی چاہیے۔ انہوں نے بتایا کہ مودی کو یہ پیغام ٹیلی فون پر براہ راست دیا گیا ہے۔
اوول آفس میں صحافیوں سے گفتگو کرتے ہوئے ٹرمپ نے بتایا کہ دیوالی کے موقع پر بھارتی وزیراعظم سے ٹیلی فون پر تفصیلی گفتگو ہوئی، جس میں تجارت سمیت مختلف اہم امور زیرِ بحث آئے۔ انہوں نے کہا کہ وہ معاملات کو تجارتی تعاون کے ذریعے حل کرنے کی کوشش کر رہے ہیں۔
ٹرمپ نے مزید کہا کہ چین اور یورپی ممالک نے برسوں سے امریکا پر سخت محصولات عائد کیے ہوئے ہیں، اور کسٹم ڈیوٹی امریکی قومی سلامتی کے تحفظ کا ایک اہم ذریعہ ہے۔ ان کا کہنا تھا کہ اگر محصولات ختم کر دیے جائیں تو امریکی معیشت گر جائے گی۔
امریکی صدر نے مزید بتایا کہ بھارت روس سے مزید تیل نہیں خریدے گا، جس سے دونوں ملکوں کے درمیان اقتصادی تعلقات میں نئی سمت متعین ہوگی۔
