وفاقی دارالحکومت اسلام آباد کے مختلف سیکٹرز میں تیز بارش اور ژالہ باری کا سلسلہ شروع ہوگیا ہے، جس کے ساتھ ہی شہر کا موسم اچانک تبدیل ہوا اور سردی کی شدت میں نمایاں اضافہ ریکارڈ کیا گیا ہے۔ مسلسل ہوتی بارش نے شہر میں خنکی بڑھا دی ہے اور کئی علاقوں میں معمولاتِ زندگی بھی متاثر ہوئے۔
محکمہ موسمیات نے پہلے ہی جڑواں شہروں سمیت ملک کے متعدد حصوں میں 4 سے 5 نومبر تک بارشوں کی پیشگوئی کر رکھی تھی، جس کے تحت مزید بارشوں کا امکان ظاہر کیا جا رہا ہے۔ ماہرینِ موسمیات کے مطابق موجودہ سسٹم کے باعث درجہ حرارت میں مزید کمی بھی متوقع ہے۔
ادھر پروونشل ڈیزاسٹر مینجمنٹ اتھارٹی (پی ڈی ایم اے) نے خیبر پختونخوا کے مختلف اضلاع میں آج سے بارشوں کا الرٹ جاری کر دیا ہے۔ اتھارٹی کی رپورٹ کے مطابق صوبے کے بالائی علاقوں میں 5 نومبر تک وقفے وقفے سے بارش اور بعض مقامات پر برفباری کا امکان موجود ہے۔
پی ڈی ایم اے نے تمام ضلعی انتظامیہ کو ہدایت کی ہے کہ حفاظتی اقدامات یقینی بنائے جائیں تاکہ کسی بھی ہنگامی صورتحال میں فوری کارروائی کی جا سکے۔
مزید یہ کہ پہاڑی علاقوں میں لینڈ سلائیڈنگ کے خطرے کا انتباہ بھی جاری کیا گیا ہے، جس کے باعث سڑکوں کی بندش یا ٹریفک کی روانی متاثر ہوسکتی ہے۔ عوام کو مشورہ دیا گیا ہے کہ غیر ضروری سفر سے گریز کریں اور موسم کی اپڈیٹس پر نظر رکھیں۔
