وزیراعظم پاکستان محمد شہباز شریف نے کہا ہے کہ پوری قوم دہشت گردی کے خلاف جاری جنگ میں اپنی بہادر افواج کے شانہ بشانہ کھڑی ہے اور ملک سے دہشت گردی کے مکمل خاتمے کے لئے ثابت قدم ہے۔ وزیراعظم نے کلاچی، ضلع ڈیرہ اسماعیل خان اور دتہ خیل، ضلع شمالی وزیرستان میں فتنتہ الخوارج کے دہشت گردوں کے خلاف سکیورٹی فورسز کی دو مختلف کامیاب کارروائیوں پر انہیں زبردست خراج تحسین پیش کیا۔
وزیراعظم نے ان آپریشنز میں سکیورٹی فورسز کی جانب سے فتنہ الخوارج کے 15 دہشت گردوں کے ہلاک کیے جانے کو ملکی سلامتی اور امن کے لیے ایک انتہائی اہم کامیابی قرار دیتے ہوئے کہا کہ ویژن “عزمِ استحکام” کے تحت ہماری سکیورٹی فورسز دہشت گردی کے خلاف مسلسل نمایاں اور مؤثر کامیابیاں حاصل کر رہی ہیں، جس پر پوری قوم انہیں خراجِ تحسین پیش کرتی ہے۔
اپنے بیان میں وزیراعظم شہباز شریف نے مزید کہا کہ دہشت گردی کے خلاف یہ جنگ صرف افواج پاکستان کی نہیں بلکہ پوری قوم کی مشترکہ جدوجہد ہے۔ انہوں نے واضح کیا کہ عوام اپنے سیکیورٹی اداروں کے ساتھ مکمل یکجہتی کے ساتھ کھڑے ہیں اور ہم ملک سے ہر قسم کی دہشت گردی کے خاتمے کے لیے پرعزم ہیں تاکہ پاکستان میں امن، سلامتی اور استحکام کو یقینی بنایا جا سکے۔
