کراچی میں موسم ایک بار پھر خشک اور قدرے خنک ہونے جا رہا ہے۔ محکمہ موسمیات نے پیشگوئی کی ہے کہ آئندہ تین روز کے دوران شہر میں شمال مشرقی سمت سے 20 سے 25 کلومیٹر فی گھنٹہ کی رفتار سے ہلکی مگر تیز ہوائیں چل سکتی ہیں۔
محکمہ موسمیات کے مطابق شہر کا کم سے کم درجہ حرارت 16 ڈگری سینٹی گریڈ کے آس پاس رہے گا جبکہ دن کے وقت زیادہ سے زیادہ درجہ حرارت 28 ڈگری سینٹی گریڈ تک پہنچنے کا امکان ہے۔ مجموعی طور پر موسم خشک اور ٹھنڈا رہنے کی توقع ہے۔
ادارے نے بتایا کہ سندھ کے بیشتر اضلاع میں رات کے وقت سردی میں مزید اضافہ ہوگا جبکہ دن کے اوقات میں موسم خنک رہے گا۔ میدانی علاقوں میں صبح سویرے دھند پڑنے کا خدشہ ہے، جس سے حدِنِگاہ متاثر ہو سکتی ہے، اسی لیے شہریوں کو سفر کے دوران احتیاط کی ہدایت جاری کی گئی ہے۔
