پاکستان پیپلز پارٹی کے چیئرمین بلاول بھٹو زرداری نے کہا ہے کہ مسلح افواج نے ملکی خودمختاری کا بھرپور دفاع کیا اور بھارت کے خلاف حاصل ہونے والی کامیابی محض ایک عسکری کامیابی نہیں بلکہ ایک بڑی اخلاقی فتح بھی ہے، جس نے پوری قوم کا حوصلہ بلند کیا ہے۔
کیڈٹ کالج پٹارو میں خطاب کرتے ہوئے بلاول بھٹو زرداری نے کیڈٹس سے کہا کہ پاکستان اس وقت معاشی دباؤ سمیت مختلف داخلی اور خارجی چیلنجز کا سامنا کر رہا ہے، تاہم ان مشکلات کے باوجود ملک کا مستقبل روشن ہے۔ انہوں نے کہا کہ آنے والا پاکستان ان افراد کے ہاتھوں تشکیل پائے گا جو شارٹ کٹ کے بجائے دیانت داری، ذاتی مفاد کے بجائے عوامی خدمت اور آسان راستے کے بجائے مسلسل محنت، صبر اور حوصلے کو اپنائیں گے۔
افواجِ پاکستان کے کردار پر روشنی ڈالتے ہوئے چیئرمین پیپلز پارٹی نے کہا کہ بھارتی جارحیت کے مؤثر جواب میں مسلح افواج نے اعلیٰ پیشہ ورانہ صلاحیت، مضبوط اتحاد اور قومی یکجہتی کا مظاہرہ کرتے ہوئے نمایاں کامیابی حاصل کی۔ ان کا کہنا تھا کہ افواجِ پاکستان نے نہ صرف ملکی سرحدوں اور خودمختاری کا بھرپور تحفظ کیا بلکہ اس کامیابی کے ذریعے پوری دنیا کو یہ پیغام دیا کہ پاکستان جب متحد ہوتا ہے تو کوئی طاقت اسے شکست نہیں دے سکتی۔ انہوں نے مزید کہا کہ پاکستانی قوم نے ثابت کر دیا ہے کہ اتحاد اور یکجہتی ہی اس کی اصل طاقت ہے۔
