کراچی: وفاقی وزیر داخلہ محسن نقوی نے منی لانڈرنگ، جعلی ادویات اور انسانی اسمگلنگ میں ملوث مافیا کے خلاف بڑے پیمانے پر کریک ڈاؤن کا حکم دے دیا ہے، جس کا مقصد ان جرائم میں ملوث عناصر کے خلاف بلاامتیاز کارروائی کو یقینی بنانا ہے۔
تفصیلات کے مطابق محسن نقوی نے ایف آئی اے کراچی زون کا دورہ کیا، جہاں انہوں نے ایف آئی اے کراچی زون اور ساؤتھ زون کی مجموعی کارکردگی کا تفصیلی جائزہ لیا اور جاری اقدامات پر بریفنگ حاصل کی۔
اجلاس کے دوران وزیر داخلہ محسن نقوی نے منی لانڈرنگ میں ملوث مافیا کے خلاف بھرپور اور مؤثر کریک ڈاؤن کی ہدایت دیتے ہوئے کہا کہ بڑے منی لانڈرز کے خلاف سخت کارروائی کی جائے اور منی لانڈرنگ میں ملوث عناصر کی مکمل منی ٹریل کو بے نقاب کیا جائے۔ انہوں نے واضح کیا کہ حوالہ ہنڈی کا کاروبار کسی صورت برداشت نہیں کیا جائے گا اور اس ضمن میں بلاامتیاز ایکشن نظر آنا چاہیے۔
اجلاس میں محسن نقوی نے انسانی اسمگلنگ میں ملوث ایجنٹس مافیا کے خلاف بھی مؤثر کارروائی کا حکم دیا اور کہا کہ معصوم لوگوں کو جھانسہ دے کر بیرون ملک بھجوانے والے کسی رعایت کے مستحق نہیں۔ انہوں نے ہدایت کی کہ کسی دباؤ کے بغیر ایجنٹس مافیا کے خلاف کارروائیاں کی جائیں۔
وفاقی وزیر داخلہ نے جعلی ادویات کے کاروبار کو انسانی جانوں سے کھیلنے کے مترادف قرار دیتے ہوئے کہا کہ اس مکروہ دھندے میں ملوث عناصر کو ہر صورت قانون کی گرفت میں لایا جائے۔
محسن نقوی نے کہا کہ ایف آئی اے کراچی زون میں انسانی وسائل کی کمی کو ترجیحی بنیادوں پر دور کیا جائے گا اور ادارے کو تمام ضروری وسائل فراہم کیے جائیں گے، تاکہ بہتر کارکردگی کے ذریعے ادارے کی نیک نامی میں اضافہ کیا جا سکے۔
اس سے قبل اجلاس میں ڈائریکٹر ایف آئی اے کراچی زون نے وزیر داخلہ کو بریفنگ دیتے ہوئے بتایا کہ گزشتہ چار ماہ کے دوران انسانی اسمگلنگ میں ملوث 20 ایجنٹس کو گرفتار کیا گیا، جبکہ 140 ملین روپے مالیت کی نان کسٹم مصنوعات اور منشیات ضبط کی گئیں۔ انہوں نے مزید بتایا کہ مسافروں کی سہولت کے لیے کراچی ایئرپورٹ پر سہولت سینٹر بھی قائم کر دیا گیا ہے۔
وزیر داخلہ محسن نقوی نے اجلاس کے دوران انچارج افسران سے ان کے متعلقہ سرکلز کی کارکردگی رپورٹس طلب کیں اور مزید محنت اور پیشہ ورانہ انداز میں کام کرنے کی ہدایت کی۔
اجلاس میں ایڈیشنل ڈائریکٹر جنرل ایف آئی اے ساؤتھ مجاہد اکبر خان، ڈپٹی ڈائریکٹر اینٹی منی لانڈرنگ، ڈپٹی ڈائریکٹر اینٹی کرپشن، ڈپٹی ڈائریکٹر اینٹی اسمگلنگ، ڈپٹی ڈائریکٹر امیگریشن، ڈپٹی ڈائریکٹر کرائمز، ڈپٹی ڈائریکٹر کمرشل بینکنگ سمیت تمام ڈپٹی ڈائریکٹرز اور متعلقہ حکام نے شرکت کی۔
