وفاقی وزیر پیٹرولیم علی پرویز ملک نے گھریلو صارفین کو گیس کی بہتر اور مسلسل فراہمی یقینی بنانے کی ہدایت جاری کر دی ہے، جبکہ گیس کی طلب اور رسد سے متعلق ہفتہ وار رپورٹ پیش کرنے کا بھی حکم دیا گیا ہے۔ اجلاس سے خطاب کرتے ہوئے وفاقی وزیر نے کہا کہ گیس کمپنیوں کو گھریلو صارفین کو فوری ریلیف فراہم کرنے کی واضح ہدایات دی گئی ہیں تاکہ عوام کو درپیش مشکلات میں کمی لائی جا سکے۔
علی پرویز ملک نے بتایا کہ صنعت کے شعبے سے گھریلو صارفین کے لیے اضافی گیس منتقل کرنے کے آپشن پر سنجیدگی سے غور کیا جا رہا ہے، تاکہ گھریلو سطح پر گیس کی کمی کو پورا کیا جا سکے۔ ان کا کہنا تھا کہ پیٹرولیم ڈویژن میں روزانہ صبح 10 بجے گیس کی مجموعی صورتحال کی مانیٹرنگ کی جا رہی ہے تاکہ کسی بھی مسئلے کا بروقت حل ممکن بنایا جا سکے۔
اجلاس میں سوئی نادرن کے حکام نے بریفنگ دیتے ہوئے بتایا کہ صنعتوں کے لیے گیس بندش کا دورانیہ ایک دن سے بڑھا کر دو دن کرنے پر مشاورت جاری ہے۔ حکام کے مطابق دو گیس فیلڈز کی بحالی کے بعد گیس سپلائی کی صورتحال میں واضح بہتری آئی ہے۔
حکام نے مزید بتایا کہ گزشتہ سال کے مقابلے میں اس وقت گھریلو صارفین کو 39 ایم ایم سی ایف ڈی اضافی گیس فراہم کی جا رہی ہے، جس سے گھریلو سطح پر گیس کی دستیابی میں بہتری متوقع ہے۔
