عالمی اور مقامی مارکیٹوں میں سونے کی قیمتوں میں کمی ریکارڈ کی گئی ہے، جبکہ اس کے برعکس چاندی کی قیمتوں میں واضح اضافہ دیکھنے میں آیا ہے، جس سے قیمتی دھاتوں کی مارکیٹ میں ملا جلا رجحان سامنے آیا ہے۔
بین الاقوامی بلین مارکیٹ میں آج فی اونس سونے کی قیمت میں 15 ڈالر کی کمی واقع ہوئی، جس کے بعد سونا کم ہو کر 5 ہزار 082 ڈالر فی اونس کی سطح پر آ گیا۔ عالمی سطح پر قیمتوں میں اس کمی کے اثرات مقامی مارکیٹ میں بھی نمایاں رہے، جہاں فی تولہ سونے کی قیمت 1 ہزار 500 روپے کم ہو کر 5 لاکھ 30 ہزار 562 روپے پر آ گئی۔
اسی طرح مقامی صرافہ مارکیٹ میں فی 10 گرام سونے کی قیمت میں بھی 1 ہزار 286 روپے کی کمی ریکارڈ کی گئی، جس کے بعد سونے کی نئی قیمت 4 لاکھ 54 ہزار 871 روپے مقرر ہو گئی۔
دوسری جانب چاندی کی قیمتوں میں اضافہ دیکھنے میں آیا، جہاں فی تولہ چاندی کی قیمت 212 روپے بڑھ کر 11 ہزار 640 روپے کی نئی سطح تک پہنچ گئی۔ اسی طرح فی 10 گرام چاندی کی قیمت میں بھی 182 روپے کا اضافہ ہوا، جس کے بعد یہ قیمت 9 ہزار 979 روپے ہو گئی۔
یاد رہے کہ ایک روز قبل عالمی مارکیٹ میں سونے کی قیمت میں غیر معمولی اضافہ ریکارڈ کیا گیا تھا، جب فی اونس سونا اچانک 109 ڈالر بڑھ کر 5 ہزار 097 ڈالر کی بلند ترین سطح پر پہنچ گیا تھا، جس کے اثرات مقامی مارکیٹ میں بھی دیکھے گئے تھے۔
گزشتہ روز مقامی سطح پر فی تولہ سونے کی قیمت میں 10 ہزار 900 روپے کا بڑا اضافہ ہوا تھا، جس کے بعد سونا 5 لاکھ 32 ہزار 062 روپے تک پہنچ گیا تھا، جبکہ فی 10 گرام سونے کی قیمت 9 ہزار 345 روپے اضافے کے بعد 4 لاکھ 56 ہزار 157 روپے پر بند ہوئی تھی۔
اسی طرح گزشتہ روز چاندی کی قیمت میں بھی نمایاں اضافہ ریکارڈ کیا گیا تھا، جب فی تولہ چاندی کی قیمت 537 روپے بڑھ کر 11 ہزار 428 روپے تک پہنچ گئی تھی۔
