شہر قائد کراچی میں معمول سے تیز ہوائیں چلنا شروع ہو گئی ہیں اور ہوا کی رفتار 30 سے 35 کلو میٹر فی گھنٹہ تک ریکارڈ کی جا رہی ہے، جس کے باعث موسم میں واضح تبدیلی محسوس کی جا رہی ہے۔
محکمہ موسمیات کے مطابق یہ ہوائیں شمال مشرقی سمت سے چل رہی ہیں اور انتہائی خشک نوعیت کی ہیں، جبکہ شہر میں ہوا میں نمی کا تناسب 25 سے 35 فیصد کے درمیان ریکارڈ کیا جا رہا ہے، جو نسبتاً کم ہے۔
محکمہ موسمیات نے پیش گوئی کی ہے کہ آئندہ 24 گھنٹوں کے دوران شہر کا موسم خشک رہنے کا امکان ہے اور کسی نمایاں موسمی تبدیلی کی توقع نہیں کی جا رہی۔
اعداد و شمار کے مطابق گزشتہ رات شہر کا کم سے کم درجہ حرارت 20 ڈگری سینٹی گریڈ ریکارڈ کیا گیا، جبکہ آج زیادہ سے زیادہ درجہ حرارت 30 سے 32 ڈگری سینٹی گریڈ تک رہنے کا امکان ظاہر کیا گیا ہے۔
