بھارت کی ریاست جھارکھنڈ کے ضلع چترا میں ایک ائیر ایمبولینس حادثے کا شکار ہو کر گر کر تباہ ہو گئی، جس میں 7 افراد سوار تھے۔ یہ طیارہ رنچی سے نئی دہلی جا رہا تھا اور ایک مریض کو علاج کے لیے منتقل کیا جا رہا تھا۔ حادثے کے بعد علاقے میں امدادی سرگرمیاں تیز کر دی گئی ہیں۔
بھارتی میڈیا رپورٹس کے مطابق حادثہ پیر کی رات ضلع چترا کے علاقے سیماریا کے قریب پیش آیا۔ ائیر ایمبولینس مریض کو رنچی سے نئی دہلی لے جا رہی تھی کہ دورانِ پرواز اس کا رابطہ منقطع ہو گیا اور بعد ازاں طیارہ گر کر تباہ ہو گیا۔
چترا کی ڈپٹی کمشنر کے مطابق طیارہ گھنے جنگل میں گرنے کے باعث فوری طور پر ہلاکتوں کی حتمی تصدیق ممکن نہیں ہو سکی۔ تاہم ابتدائی اطلاعات کے مطابق طیارے میں سوار تمام افراد کے زندہ بچنے کی امید انتہائی کم ظاہر کی جا رہی ہے۔
حکام کے بیان کے مطابق طیارے نے شام 7 بج کر 34 منٹ پر کولکتہ ایئر ٹریفک کنٹرول سے آخری مرتبہ رابطہ کیا تھا، جس کے کچھ ہی دیر بعد اس کا کنٹرول روم سے رابطہ منقطع ہو گیا۔ اس کے بعد طیارے کے گرنے کی اطلاع موصول ہوئی۔
ریسکیو ٹیمیں فوری طور پر حادثے کے مقام پر پہنچ گئی ہیں اور امدادی کارروائیاں جاری ہیں۔ حکام نے حادثے کی وجوہات جاننے کے لیے تحقیقات کا آغاز کر دیا ہے تاکہ واقعے کے اسباب کا تعین کیا جا سکے۔
