قطر میں گمراہ کن معلومات اور افواہیں پھیلانے کے الزام میں 313 افراد کو گرفتار کر لیا گیا ہے جبکہ حکام نے سوشل میڈیا پر غیر مصدقہ مواد پھیلانے کے خلاف سخت کارروائی کا عندیہ بھی دیا ہے۔
عرب میڈیا رپورٹس کے مطابق حراست میں لیے گئے افراد کا تعلق مختلف ممالک سے بتایا جا رہا ہے اور ان کے خلاف سائبر قوانین کے تحت کارروائی کی جا رہی ہے۔
قطری وزارت داخلہ کے بیان کے مطابق ان افراد کو سائبر کرائمز کی روک تھام کے لیے قائم خصوصی ادارے نے گرفتار کیا ہے۔ حکام کا کہنا ہے کہ گرفتار افراد پر افواہیں اور گمراہ کن معلومات پھیلانے کا الزام ہے جس سے عوام میں بے چینی پیدا ہونے کا خدشہ تھا۔
بیان میں کہا گیا ہے کہ بعض افراد نے غیر مجاز ویڈیو کلپس تیار کر کے انہیں سوشل میڈیا پلیٹ فارمز پر پھیلایا جو سرکاری ہدایات اور قوانین کی واضح خلاف ورزی ہے۔
قطری حکام نے عوام سے اپیل کی ہے کہ وہ معلومات حاصل کرنے کے لیے صرف مستند اور سرکاری ذرائع پر انحصار کریں اور ایسے کسی بھی مواد کو شیئر کرنے سے گریز کریں جس میں غلط یا گمراہ کن معلومات شامل ہوں۔
