وزیراعظم شہباز شریف آج شام صدر مملکت آصف علی زرداری سے اہم ملاقات کریں گے، جس میں ملک بھر میں ممکنہ اسمارٹ لاک ڈاؤن کے نفاذ پر غور کیا جائے گا، جبکہ دیگر اہم قومی اور علاقائی امور بھی زیر بحث آئیں گے۔
ذرائع کے مطابق اس ملاقات میں نائب وزیراعظم اسحاق ڈار، وزیر خزانہ اور وزیر پیٹرولیم کی شرکت متوقع ہے، جبکہ چیئرمین پیپلز پارٹی بلاول بھٹو زرداری بھی اس اہم مشاورت میں شریک ہوں گے۔
ملاقات کے دوران خطے میں بڑھتی ہوئی کشیدہ صورتحال پر تفصیلی بات چیت کی جائے گی، جبکہ صدر مملکت کو ملک میں اسمارٹ لاک ڈاؤن کے ممکنہ نفاذ سے متعلق بریفنگ بھی دی جائے گی۔
ذرائع کا کہنا ہے کہ امریکا اور ایران کے درمیان جاری کشیدگی میں پاکستان کی جانب سے دی گئی ثالثی کی پیشکش پر بھی غور کیا جائے گا، جس کے سفارتی پہلوؤں کا جائزہ لیا جائے گا۔
دوسری جانب سندھ حکومت نے کفایت شعاری کے تحت اہم اقدامات کرتے ہوئے جمعہ کے روز ورک فرام ہوم کا فیصلہ کیا ہے، جبکہ سندھ کابینہ نے تین ماہ کی تنخواہ نہ لینے کا بھی اعلان کیا ہے۔
صوبائی وزیر شرجیل میمن کا کہنا ہے کہ ایندھن کی کمی پر قابو پانے کے لیے وفاقی حکومت جو بھی فیصلے کرے گی سندھ حکومت ان پر عمل کرے گی، اور حالات مکمل طور پر بہتر ہونے تک اقدامات جاری رکھے جائیں گے۔
انہوں نے مزید کہا کہ اگر وفاقی حکومت لاک ڈاؤن کا فیصلہ کرتی ہے تو سندھ حکومت بھی اس پر مکمل عملدرآمد کرے گی۔
