صدر مملکت آصف علی زرداری سے وزیراعظم شہباز شریف نے ایوان صدر میں ملاقات کی، جس میں مشرق وسطیٰ میں جاری کشیدگی کے خاتمے کے لیے ممکنہ ثالثی اور دیگر اہم امور پر تفصیلی تبادلہ خیال کیا گیا۔
ملاقات کے دوران نائب وزیراعظم اسحاق ڈار، وزیر داخلہ محسن نقوی اور وزیر قانون اعظم نذیر تارڑ بھی وزیراعظم کے ہمراہ موجود تھے، جبکہ اعلیٰ سطح کی اس بیٹھک میں مختلف اہم معاملات زیر غور آئے۔
ذرائع کے مطابق صدر مملکت کو خطے کی بدلتی ہوئی صورتحال اور سفارتی کوششوں کے حوالے سے بریفنگ دی گئی، جبکہ مشرق وسطیٰ میں کشیدگی کم کرنے کے لیے پاکستان کے ممکنہ کردار پر بھی گفتگو کی گئی۔
اس موقع پر ملکی سلامتی، معیشت اور مجموعی سیاسی صورتحال پر بھی مشاورت کی گئی، اور قومی سطح پر درپیش چیلنجز سے نمٹنے کے لیے مختلف پہلوؤں کا جائزہ لیا گیا۔
