محکمہ موسمیات نے کراچی سمیت سندھ بھر کے لیے الرٹ جاری کرتے ہوئے خبردار کیا ہے کہ مغربی ہواؤں کا ایک سلسلہ آج بلوچستان کے جنوب مغربی علاقوں میں داخل ہونے کا امکان ہے، جس کے اثرات صوبے بھر میں محسوس کیے جائیں گے۔
محکمہ موسمیات کے مطابق آج سے 4 اپریل کے دوران کراچی، جامشورو، دادو، لاڑکانہ، قمبر شہداد کوٹ، سکھر، خیرپور، کشمور، جیکب آباد، مٹیاری، تھرپارکر، عمرکوٹ، بدین، ٹھٹہ، حیدرآباد اور دیگر علاقوں میں بارش متوقع ہے۔
ادارے کا کہنا ہے کہ سندھ بھر میں آندھی اور گرج چمک کے ساتھ بارش کا امکان ہے، جبکہ بعض مقامات پر درمیانی سے موسلا دھار بارش اور ژالہ باری بھی ہو سکتی ہے، جس سے شہریوں کو احتیاطی تدابیر اختیار کرنے کی ہدایت کی گئی ہے۔
محکمہ موسمیات نے خبردار کیا ہے کہ تیز ہواؤں، ژالہ باری اور آسمانی بجلی گرنے کے باعث بجلی کے کھمبوں، سولر پینلز، بل بورڈز اور کھڑی فصلوں کو نقصان پہنچنے کا خدشہ موجود ہے۔
کراچی کے حوالے سے پیشگوئی کرتے ہوئے بتایا گیا ہے کہ آج ہلکی بارش اور بوندا باندی جبکہ کل گرج چمک کے ساتھ بارش کا امکان ہے، جبکہ جمعے کے روز بھی بادل چھائے رہنے اور وقفے وقفے سے ہلکی بارش ہونے کی توقع ہے۔
