کراچی میں وزیراعلیٰ سندھ مراد علی شاہ کی ہدایت پر صوبائی حکومت نے اسکول وین کے کرایوں میں اضافہ نہ کرنے کا باقاعدہ حکم نامہ جاری کر دیا ہے، جس کے تحت موجودہ کرایوں کو برقرار رکھنے کی ہدایت دی گئی ہے۔
ترجمان وزیراعلیٰ سندھ کے مطابق اس سلسلے میں تمام سرکاری اور نجی تعلیمی اداروں کو باقاعدہ مراسلہ ارسال کیا گیا ہے، جس میں واضح طور پر کہا گیا ہے کہ طلبہ کی پک اینڈ ڈراپ ٹرانسپورٹ فیس میں کسی بھی قسم کے اضافے کی اجازت نہیں ہوگی، اور تمام ادارے موجودہ فیس ہی برقرار رکھیں گے۔
حکام کا کہنا ہے کہ سندھ حکومت ٹرانسپورٹ آپریٹرز کو ضروری سہولیات فراہم کرے گی تاکہ وہ اضافی مالی بوجھ طلبہ اور والدین پر منتقل نہ کریں، جبکہ تمام تعلیمی اداروں کو ان احکامات پر مکمل اور مؤثر عملدرآمد یقینی بنانے کی ہدایت بھی جاری کی گئی ہے۔
اس کے ساتھ ہی اسکولوں کے لیے یہ بھی لازمی قرار دیا گیا ہے کہ وہ طلبہ کی ٹرانسپورٹ سروسز کا مکمل اور درست ڈیٹا فراہم کریں، جبکہ احکامات کی خلاف ورزی کرنے والوں کے خلاف قانونی کارروائی کی وارننگ بھی دی گئی ہے۔
