ایران اور امریکا کے درمیان جاری مذاکرات کے مثبت اثرات سامنے آنا شروع ہو گئے ہیں، جس کے نتیجے میں ایشیائی مالیاتی منڈیوں میں استحکام دیکھا گیا جبکہ عالمی سطح پر خام تیل کی قیمتوں میں بھی نمایاں کمی ریکارڈ کی گئی۔
میڈیا رپورٹس کے مطابق ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت کم ہو کر 97 ڈالر فی بیرل تک آ گئی ہے، جبکہ برینٹ خام تیل بھی کمی کے بعد 95.37 ڈالر فی بیرل کی سطح پر ٹریڈ کرتا دیکھا گیا۔
دوسری جانب پاکستان اسٹاک ایکسچینج میں بھی مثبت رجحان دیکھنے میں آیا، جہاں ہنڈریڈ انڈیکس میں ایک ہزار 993 پوائنٹس کا اضافہ ہوا اور مارکیٹ ایک لاکھ 67 ہزار 457 پوائنٹس کی سطح پر بند ہوئی۔
علاقائی مارکیٹوں میں بھی بہتری کا رجحان دیکھا گیا، جاپان کا نکئی انڈیکس تقریباً 2 فیصد اضافے کے ساتھ بند ہوا، جبکہ جنوبی کوریا کا کاسپی انڈیکس 1.40 فیصد بڑھا۔ اسی طرح ہانگ کانگ کے ہینگ سینگ انڈیکس میں 0.55 فیصد اضافہ ریکارڈ کیا گیا، جبکہ بھارت کا ممبئی سینسیکس بھی دورانِ کاروبار 1.2 فیصد تک بڑھ گیا۔
