بین الاقوامی مارکیٹ میں خام تیل کی قیمتوں میں ایک بار پھر اضافے کا رجحان سامنے آیا ہے، جہاں برینٹ خام تیل کی قیمت 95 ڈالر فی بیرل کی سطح سے اوپر چلی گئی ہے، جس سے توانائی کی عالمی منڈی میں نئی سرگرمی دیکھنے میں آ رہی ہے۔
تفصیلات کے مطابق برینٹ خام تیل کی قیمت میں 0.95 فیصد اضافہ ریکارڈ کیا گیا ہے، جس کے بعد اس کی قیمت بڑھ کر 95.69 ڈالر فی بیرل ہو گئی ہے، جبکہ دوسری جانب امریکی ویسٹ ٹیکساس انٹرمیڈیٹ کی قیمت بھی 0.48 فیصد اضافے کے ساتھ 91.70 ڈالر فی بیرل تک پہنچ گئی ہے۔
یہ اضافہ ایسے وقت میں سامنے آیا ہے جب گزشتہ رات عالمی مارکیٹ میں خام تیل کی قیمتوں میں 2.5 فیصد سے زائد کی نمایاں کمی ریکارڈ کی گئی تھی، تاہم اس کمی کے بعد مارکیٹ میں دوبارہ تیزی کا رجحان دیکھنے میں آیا ہے۔
ماہرین کے مطابق سپلائی سے متعلق خدشات اور عالمی مارکیٹ کی غیر یقینی صورتحال کے باعث قیمتوں میں دوبارہ اضافہ شروع ہوا ہے، جبکہ آنے والے دنوں میں بھی قیمتوں میں اتار چڑھاؤ جاری رہنے کا امکان ظاہر کیا جا رہا ہے۔
