خاتون اول آصفہ بھٹو زرداری نے ملک میں پہلی بار شروع ہونے والی ایچ پی وی (HPV) ویکسینیشن مہم کو ایک تاریخی سنگ میل قرار دیا ہے۔ ان کا کہنا تھا کہ یہ قومی مہم 9 سے 14 سال کی بچیوں کو سروائیکل کینسر سے بچانے کے لیے نہایت اہم قدم ہے۔
اپنے بیان میں آصفہ بھٹو نے کہا کہ سروائیکل کینسر دنیا کا واحد کینسر ہے جس سے بچاؤ ویکسین کے ذریعے ممکن ہے، اس لیے والدین کو چاہیے کہ وہ اپنی بیٹیوں کو یہ ویکسین لازمی لگوائیں تاکہ ان کا مستقبل محفوظ بنایا جا سکے۔ انہوں نے کہا: “آئیے مل کر اپنی بیٹیوں کے لیے ایک صحت مند مستقبل یقینی بنائیں۔”
دوسری جانب صوبہ سندھ میں اس مہم کا باضابطہ آغاز کر دیا گیا ہے۔ خاتونِ پاکستان گرلز اسکول میں منعقدہ تقریب میں صوبائی وزیر صحت ڈاکٹر عذرا فضل پیچوہو نے انسداد ایچ پی وی مہم کا افتتاح کیا۔
افتتاحی تقریب میں وزارتِ صحت کے حکام، ڈبلیو ایچ او، یونیسف اور مختلف بین الاقوامی این جی اوز کے نمائندے بھی شریک ہوئے۔
محکمہ صحت سندھ کے مطابق 9 سے 14 سال کی تمام بچیوں کو ایچ پی وی ویکسین مفت فراہم کی جائے گی، جو سرکاری اسکولوں اور تمام صحت مراکز پر دستیاب ہوگی۔
