ملک بھر میں سونے کی قیمتوں میں اتار چڑھاؤ کا سلسلہ بدستور جاری ہے، اور آج مقامی مارکیٹ میں ایک بار پھر نمایاں کمی ریکارڈ کی گئی ہے۔ آل پاکستان جیمز اینڈ جیولرز ایسوسی ایشن کے مطابق فی تولہ سونے کی قیمت میں 5 ہزار روپے کی کمی ہوئی، جس کے بعد ملک میں سونے کا نیا بھاؤ 4 لاکھ 26 ہزار 562 روپے پر آ گیا ہے، جو گزشتہ چند روز کے دوران قیمتوں میں اضافے اور کمی کے مسلسل رجحان کو مزید واضح کرتا ہے۔
اسی طرح 10 گرام سونے کی قیمت میں بھی نمایاں کمی دیکھنے میں آئی، جو 4286 روپے کم ہو کر 3 لاکھ 65 ہزار 708 روپے ہو گئی ہے۔ سونے کی قیمتوں میں یہ کمی عالمی مارکیٹ میں آنے والی مندی سے جڑی ہے، جو گزشتہ کئی سیشنز سے دباؤ کا شکار ہے۔
دوسری جانب عالمی منڈی میں بھی سونے کی قیمت میں کمی ریکارڈ کی گئی، جہاں فی اونس سونا 50 ڈالر سستا ہو کر 4042 ڈالر پر ٹریڈ ہوا۔ ماہرین کے مطابق عالمی سطح پر معاشی غیر یقینی صورتحال اور ڈالر کی قدر میں اتار چڑھاؤ سونے کی قیمتوں پر براہ راست اثر انداز ہو رہا ہے۔
