راولپنڈی: اڈیالہ جیل میں بانی پی ٹی آئی عمران خان اور بشریٰ بی بی کے درمیان ملاقات کرائی گئی ہے۔
نجی ٹی وی کی رپورت میں جیل ذرائع کے حوالے سے بتایا گیا ہے کہ ملاقاتوں کے مقررہ دن کے تحت مختلف افراد نے عمران خان سے ملاقات کی، جن میں ان کی اہلیہ بشریٰ بی بی بھی شامل تھیں۔
ذرائع کا کہنا ہے کہ عدالتی ہدایات کی روشنی میں ایڈوکیٹ سلمان صفدر کو بھی عمران خان سے ملنے کی اجازت دی گئی۔ اطلاعات کے مطابق بشریٰ بی بی کی ملاقات سلمان صفدر سے پہلے کرائی گئی، جس کے بعد وکیل نے بھی تفصیلی ملاقات کی۔
سپریم کورٹ کی جانب سے سلمان صفدر کو فرینڈ آف دی کورٹ مقرر کیا گیا ہے اور انہیں عمران خان کی جیل میں صورتحال سے متعلق رپورٹ پیش کرنے کی ہدایت کی گئی ہے۔
ملاقات کے بعد اڈیالہ جیل کے باہر میڈیا سے مختصر گفتگو کرتے ہوئے سلمان صفدر نے کہا کہ انہیں عدالتی حکم کے مطابق مکمل رسائی دی گئی اور وہ تقریباً 3 گھنٹے تک موجود رہے۔ انہوں نے عمران خان کی صحت کو تسلی بخش قرار دیا اور کہا کہ رپورٹ سپریم کورٹ میں جمع کرانے تک مزید تبصرہ مناسب نہیں ہوگا۔
یہ پیش رفت سیاسی حلقوں میں خاصی اہمیت اختیار کر گئی ہے، جبکہ قانونی ماہرین اسے عدالتی نگرانی کے عمل کا حصہ قرار دے رہے ہیں۔
