وزیر داخلہ محسن نقوی نے تہران میں ایران کے صدر مسعود پزشکیان سے اہم ملاقات کی، جس میں دوطرفہ تعلقات، باہمی تعاون اور امتِ مسلمہ کو درپیش چیلنجز پر تفصیلی تبادلۂ خیال کیا گیا۔
محسن نقوی نے ایرانی صدر کو حالیہ جنگ میں عظیم فتح پر مبارکباد پیش کرتے ہوئے کہا کہ ایران کے سپریم لیڈر سمیت پوری قوم نے جس جرأت، حکمتِ عملی اور اتحاد کے ساتھ جارحیت کا مقابلہ کیا، وہ پوری امتِ مسلمہ کے لیے باعثِ فخر ہے۔
وزیر داخلہ نے کہا کہ پاکستان نے ہر فورم پر ایران پر حملے کی شدید مذمت کی اور ایران کے ساتھ یکجہتی کا بھرپور اظہار کیا۔ انہوں نے وزیراعظم محمد شہباز شریف کی جانب سے ایرانی صدر اور قوم کے لیے نیک خواہشات اور احترام کا پیغام بھی پہنچایا۔
ایرانی صدر مسعود پزشکیان نے پاکستان کے کردار کو تاریخی اور قابلِ قدر قرار دیتے ہوئے کہا کہ ہم کبھی نہیں بھول سکتے کہ جنگ کے دوران پاکستان نے جس طرح ہمارا ساتھ دیا، وہ ہماری یادوں میں محفوظ رہے گا۔
صدر پزشکیان نے زور دیا کہ صہیونی حکومت مسلم ممالک میں انتشار پیدا کرنے کی کوششوں میں مصروف ہے، جس کا مقابلہ اسلامی اتحاد اور ہم آہنگی سے ہی ممکن ہے۔ انہوں نے کہا کہ اگر مسلم حکومتیں اسلامی وحدت کی اہمیت کو پوری طرح سمجھ لیں تو وہ صہیونی سازشوں کے خلاف ایک مؤثر اور اتحاد قائم کرسکتی ہیں۔
ایرانی صدر نے ایران اور پاکستان کے درمیان موجودہ دوطرفہ تعلقات پر اطمینان کا اظہار کیا اور ان تعلقات کو مزید مضبوط بنانے کی خواہش ظاہر کی۔
