عیدالفطر جمعہ کو ہوگی یا ہفتہ 21 مارچ کو، اس حوالے سے حتمی فیصلہ مرکزی رویت ہلال کمیٹی کے اجلاس میں کیا جائے گا، جو کل اسلام آباد میں منعقد ہوگا۔
جمعرات کے روز مرکزی رویت ہلال کمیٹی کا اجلاس چیئرمین عبدالخبیر آزاد کی سربراہی میں وزارت مذہبی امور کے دفتر میں ہوگا، جہاں چاند دیکھنے سے متعلق شہادتوں کا جائزہ لیا جائے گا۔
اس کے ساتھ ساتھ ملک بھر میں زونل رویت ہلال کمیٹیوں کے اجلاس اپنے اپنے ہیڈکوارٹرز میں منعقد ہوں گے، جہاں مقامی سطح پر چاند نظر آنے کی اطلاعات جمع کی جائیں گی۔
مرکزی کمیٹی کے اجلاس میں سپارکو اور محکمہ موسمیات کے نمائندے بھی شریک ہوں گے، جو سائنسی اور موسمیاتی معلومات فراہم کریں گے تاکہ فیصلہ سازی میں مدد مل سکے۔
مرکزی رویت ہلال کمیٹی ملک بھر سے موصول ہونے والی شہادتوں کا جائزہ لینے کے بعد چاند نظر آنے یا نہ آنے کا باضابطہ اعلان کرے گی، جس کے مطابق عیدالفطر کی تاریخ کا تعین کیا جائے گا۔
