محکمہ موسمیات نے اسلام آباد سمیت ملک کے متعدد علاقوں میں گرج چمک کے ساتھ تیز ہواؤں، آندھی اور شدید بارشوں کی پیشگوئی کرتے ہوئے عوام کو ہوشیار رہنے کی ہدایت کی ہے۔ محکمے کے مطابق، 18 جولائی تک مون سون کے اثرات جاری رہیں گے، جس کے دوران کئی مقامات پر معمول سے زیادہ شدید بارشیں ہوسکتی ہیں۔
پنجاب، خیبر پختونخوا، آزاد کشمیر، گلگت بلتستان، اسلام آباد، شمالی و جنوبی بلوچستان اور سندھ کے مختلف علاقوں میں اگلے چند دنوں میں وقفے وقفے سے بارشیں متوقع ہیں۔ محکمہ موسمیات کے مطابق، کچھ مقامات پر یہ بارشیں تیز ہواؤں، گرج چمک اور آندھی کے ساتھ موسلا دھار شکل اختیار کرسکتی ہیں۔
وسطی پنجاب کے متعدد اضلاع بشمول اسلام آباد، مری، راولپنڈی، اٹک، چکوال، جہلم، گوجرانوالہ، لاہور، سیالکوٹ اور فیصل آباد میں شدید بارشوں کا امکان ہے، جبکہ جنوبی پنجاب کے علاقوں جیسے بہاولپور، ملتان، مظفر گڑھ، رحیم یار خان اور لیہ میں بھی مون سون کی لہر کے اثرات مرتب ہوسکتے ہیں۔
خیبر پختونخوا کے پہاڑی علاقوں بشمول سوات، دیر، چترال، مانسہرہ اور ایبٹ آباد میں بھی تیز بارشوں کی پیشگوئی کی گئی ہے۔ ماہرین نے خبردار کیا ہے کہ سوات اور مالاکنڈ جیسے حساس علاقوں میں لینڈ سلائیڈنگ کا خطرہ بڑھ گیا ہے۔
بلوچستان کے اضلاع بارکھان، قلات، خضدار اور لورالائی میں بھی بارشوں کا امکان ہے، جبکہ سندھ کے جنوبی اور ساحلی علاقوں جیسے عمرکوٹ، تھرپارکر، حیدرآباد اور لاڑکانہ میں 18 سے 20 جولائی کے درمیان نئی بارشیں داخل ہوسکتی ہیں۔
محکمہ موسمیات کے ڈپٹی ڈائریکٹر انجم نذیر نے ایک ٹی وی انٹرویو میں بتایا کہ اسلام آباد اور راولپنڈی میں آج بھی موسلا دھار بارش ہوسکتی ہے، جبکہ اگلے دو دنوں میں یہ سلسلہ جنوبی اور مغربی علاقوں کی طرف منتقل ہوجائے گا۔
محکمے نے شہریوں اور متعلقہ اداروں کو ہدایت کی ہے کہ وہ احتیاطی تدابیر اختیار کریں، کیونکہ شدید بارشوں سے نشیبی علاقوں میں سیلابی ریلے اور لینڈ سلائیڈنگ کے خطرات بڑھ گئے ہیں۔
