پاکستان ویمنز کی شاندار کامیابی، تیسرے ٹی ٹوئنٹی میں آئرلینڈ کو 8 وکٹوں سے شکست، منیبہ علی کی سنچری نمایاں
اتوار کو کھیلے گئے تین میچوں کی ٹی ٹوئنٹی انٹرنیشنل سیریز کے تیسرے اور فیصلہ کن میچ میں پاکستان ویمنز ٹیم نے شاندار کارکردگی کا مظاہرہ کرتے ہوئے آئرلینڈ ویمنز کو 8 وکٹوں سے شکست دے دی۔ اس کامیابی میں اوپنر منیبہ علی کی جاندار اور دلکش سنچری نے مرکزی کردار ادا کیا۔
میچ کا آغاز ٹاس سے ہوا جو آئرلینڈ ویمنز نے جیتا اور پہلے بیٹنگ کرنے کا فیصلہ کیا۔ مقررہ 20 اوورز میں مہمان ٹیم نے 4 وکٹوں کے نقصان پر 155 رنز بنائے۔ آئرلینڈ کی اننگز میں کپتان گیبی لوئس اور ایمی ہنٹر نے پہلی وکٹ کے لیے 52 رنز کی شراکت قائم کی۔ گیبی لوئس نے 8 چوکوں کی مدد سے 36 رنز اسکور کیے اور رامین شمیم کی گیند پر آؤٹ ہوئیں۔ ایمی ہنٹر 29 رنز بنانے کے بعد وحیدہ اختر کا شکار بنیں۔
تیسری وکٹ 121 کے مجموعی اسکور پر گری جب سعدیہ اقبال نے لی پال کو 11 رنز پر پویلین کی راہ دکھائی۔ اننگز کے آخری اوور میں فاطمہ ثنا نے ریبیکا سٹوکل کو 5 رنز پر آؤٹ کیا، تاہم اس اوور میں لگنے والے تین چوکوں کی بدولت آئرلینڈ نے اپنا اسکور 155 تک پہنچا دیا۔ اورلا پرینڈر گاسٹ نے عمدہ بیٹنگ کرتے ہوئے 64 رنز ناٹ آؤٹ بنائے، جس میں 8 چوکے شامل تھے۔ یہ ان کی ٹی ٹوئنٹی انٹرنیشنل کرکٹ میں نویں اور اس سیریز کی دوسری نصف سنچری تھی۔
156 رنز کے ہدف کے تعاقب میں پاکستان ویمنز نے جارحانہ انداز اپنایا۔ اوپنر منیبہ علی نے اننگز کی ابتدائی تین گیندوں پر لگاتار تین چوکے جڑ کر میچ کا رخ ابتدا ہی سے پاکستان کے حق میں موڑ دیا۔ انہوں نے شاندار بیٹنگ کرتے ہوئے 14 چوکوں اور ایک چھکے کی مدد سے 100 رنز ناٹ آؤٹ اسکور کیے، جو ٹی ٹوئنٹی انٹرنیشنل کرکٹ میں ان کی دوسری سنچری ہے۔
شوال ذوالفقار 3 رنز اور نتالیہ پرویز 9 رنز بنا کر آؤٹ ہوئیں، جس کے بعد منیبہ علی نے عالیہ ریاض کے ساتھ مل کر تیسری وکٹ کی ناقابل شکست شراکت میں 101 رنز جوڑے۔ عالیہ ریاض نے 39 رنز ناٹ آؤٹ اسکور کیے، جن میں 5 چوکے شامل تھے۔
اس فتح کے ساتھ پاکستان نے سیریز 2-1 سے اپنے نام کرلی۔ پاکستان نے پہلا میچ 11 رنز سے جیتا، جب کہ دوسرا میچ 4 وکٹوں سے اپنے نام کیا تھا۔
