راولپنڈی میں بانی پی ٹی آئی عمران خان سے ملاقات کے موقع پر پارٹی رہنماؤں اور ارکانِ اسمبلی کی اڈیالہ جیل نہ آمد پر ان کی بہن علیمہ خان نے شدید ناراضی اور برہمی کا اظہار کیا ہے۔
اڈیالہ جیل کے باہر میڈیا سے گفتگو کرتے ہوئے علیمہ خان نے کہا کہ پارٹی کے ارکانِ اسمبلی آخر جیل کیوں نہیں پہنچے، جبکہ جو لوگ بانی پی ٹی آئی کے ووٹوں کی بدولت اسمبلیوں میں بیٹھے ہیں، انہیں آج یہاں موجود ہونا چاہیے تھا۔
انہوں نے کہا کہ جن افراد نے عمران خان کے نام پر عوام سے ووٹ حاصل کیے، ان کے لیے ضروری تھا کہ وہ اس موقع پر اپنی موجودگی یقینی بناتے، تاہم متعدد رہنماؤں کی غیر حاضری افسوسناک ہے۔
اس موقع پر پارٹی رہنما شاہد خٹک نے علیمہ خان کو وضاحت دیتے ہوئے کہا کہ ان کا بیان پارلیمانی گروپ اور خیبر پختون خوا کے ایم این ایز گروپ میں شیئر کر دیا گیا تھا اور تمام رہنماؤں کو اڈیالہ جیل پہنچنے کے لیے آگاہ بھی کیا گیا تھا۔
شاہد خٹک کا کہنا تھا کہ انہوں نے تمام متعلقہ افراد کو واضح طور پر کہہ دیا تھا کہ انہیں اڈیالہ جیل پہنچنا ہے، جبکہ آئندہ ہفتے خیبر پختون خوا کے تمام ارکانِ اسمبلی اور وزیرِ اعلیٰ بھی یہاں موجود ہوں گے۔
علیمہ خان نے مزید کہا کہ جو لوگ اڈیالہ جیل آنے کی ہمت نہیں رکھتے، انہیں اپنی نشستیں اور عہدے چھوڑ دینے چاہییں، کیونکہ جن لوگوں نے بانی پی ٹی آئی کے نام پر ووٹ لیے، انہیں اس صورتحال پر کم از کم شرم محسوس کرنی چاہیے۔
