کراچی: سندھ حکومت کے ترجمان نادر نبیل گبول نے واضح کیا ہے کہ شاہراہ بھٹو پر کسی قسم کا شگاف نہیں پڑا اور اس حوالے سے پھیلائی جانے والی افواہیں درست نہیں ہیں۔ ان کا کہنا تھا کہ شاہراہ بھٹو زیرِ تعمیر ہے اور پانی کے بہاؤ کو راستہ دینے کے لیے عارضی کٹ دیا گیا تھا تاکہ نکاسی میں آسانی ہو۔
ایک بیان میں انہوں نے کہا کہ یہ منصوبہ ایک انٹرنیشنل فرم کے تحت تعمیر ہو رہا ہے اور کسی بھی قسم کی کوتاہی برداشت نہیں کی جائے گی۔ ان کے مطابق شاہراہ بھٹو پر جدید نکاسیٔ آب کا نظام بنایا جا رہا ہے، تاہم فی الحال یہ حصہ عوام کے لیے کھولا نہیں گیا۔
نادر نبیل گبول نے مزید بتایا کہ مرزا آدم خان روڈ پر پانی کی موجودگی کی اطلاع ملی تھی مگر ریسکیو ٹیموں کی بروقت کارروائی کے بعد سڑک کلیئر کر دی گئی۔ انہوں نے وضاحت کی کہ سمندر کی سطح بلند ہونے کے باعث پانی دوبارہ لیاری ندی میں داخل ہو رہا تھا، جس سے مسائل پیدا ہوئے۔
ترجمان کے مطابق پانی کی نکاسی کے لیے 30 پمپس نصب کر دیے گئے ہیں اور مزید پمپس لگائے جا رہے ہیں تاکہ صورتحال پر قابو پایا جا سکے۔ ان کا کہنا تھا کہ محکمہ موسمیات نے مزید 100 ملی میٹر بارش کی پیشگوئی کی ہے، لیکن اگر بارش نہ ہوئی تو دوپہر تک ایم نائن شاہراہ کلیئر کر دی جائے گی۔
