بلوچستان کے ضلع مستونگ میں سیکیورٹی فورسز نے خفیہ اطلاع پر کارروائی کرتے ہوئے بھارت کی سرپرستی میں سرگرم تنظیم فتنہ الہندوستان کے 4 دہشتگردوں کو ہلاک کردیا۔ کارروائی کے دوران ان کے قبضے سے بھاری مقدار میں اسلحہ اور گولہ بارود بھی برآمد ہوا۔
پاک فوج کے شعبہ تعلقات عامہ (آئی ایس پی آر) کے مطابق ہلاک دہشتگرد علاقے میں متعدد دہشتگردی اور تخریب کاری کی کارروائیوں میں ملوث رہے تھے۔ آپریشن کے بعد علاقے کو مکمل طور پر کلیئر کرنے کے لیے سرچ اور سینیٹائزیشن آپریشن جاری ہے۔ آئی ایس پی آر نے واضح کیا ہے کہ سیکیورٹی فورسز دہشتگردی کے مکمل خاتمے کے لیے پرعزم ہیں اور ملک سے اس ناسور کو جڑ سے اکھاڑ پھینکنے تک اپنی جدوجہد جاری رکھیں گی۔
وزیراعظم نے مستونگ میں دہشتگردوں کے خلاف کامیاب کارروائی پر سیکیورٹی فورسز کو خراج تحسین پیش کیا۔ انہوں نے کہا کہ پوری قوم دہشتگردی کے خلاف جنگ میں اپنی بہادر افواج کے شانہ بشانہ کھڑی ہے اور ہم ہر قیمت پر ملک سے دہشتگردی کے مکمل خاتمے کے لیے پرعزم ہیں۔ وزیراعظم نے فتنہ الہندوستان کے چار دہشتگردوں کی ہلاکت کو ملک کے امن کے لیے اہم کامیابی قرار دیا۔
وفاقی وزیر داخلہ محسن نقوی نے بھی کامیاب آپریشن پر سیکیورٹی فورسز کی کارکردگی کو سراہا۔ انہوں نے کہا کہ سیکیورٹی فورسز نے بھارتی حمایت یافتہ دہشتگردوں کے مذموم عزائم کو ناکام بنا دیا ہے۔ محسن نقوی نے کہا کہ مستونگ میں دہشتگردوں کی ہلاکت اس بات کا ثبوت ہے کہ سیکیورٹی ادارے پوری قوت کے ساتھ ملک دشمن عناصر کا مقابلہ کر رہے ہیں اور ان کی قربانیاں ہمیشہ یاد رکھی جائیں گی۔
