وفاقی وزیر داخلہ اور پاکستان کرکٹ بورڈ کے چیئرمین محسن نقوی نے سوشل میڈیا پلیٹ فارم ایکس (سابق ٹوئٹر) پر فٹبال لیجنڈ کرسٹیانو رونالڈو کی ایک سلو موشن ویڈیو شیئر کی، جس میں وہ ہاتھ کے اشارے سے جہاز کے گرنے کی اداکاری کرتے دکھائی دیتے ہیں۔ یہ انداز بالکل ویسا ہی تھا جیسا ایشیا کپ کے دوران پاکستانی فاسٹ بولر حارث رؤف نے بھارتی شائقین کے طعنوں کے جواب میں اپنایا تھا۔
رونالڈو کی یہ ویڈیو رافیل طیارے کے گرنے کے پس منظر میں تیزی سے سوشل میڈیا پر وائرل ہو گئی۔ پاکستانی صارفین نے اس ویڈیو کو بھرپور انداز میں انجوائے کیا جبکہ بھارتی میڈیا اور شائقین نے اسے “ٹرولنگ” قرار دیا۔
واضح رہے کہ حارث رؤف کے اس اشارے پر بھارتی میڈیا نے شدید ردعمل دیا تھا اور بی سی سی آئی نے آئی سی سی میں باقاعدہ شکایت درج کرائی تھی۔ اب رونالڈو کے اشارے کو “رافیل یاد دہانی” کہا جا رہا ہے اور سوشل میڈیا صارفین اس پر دلچسپ تبصرے کر رہے ہیں۔
یہ صورتحال ایک بار پھر اس بات کو اجاگر کرتی ہے کہ پاک بھارت مقابلہ صرف میدان تک محدود نہیں رہا بلکہ اب دنیا کے بڑے اسٹارز جیسے کرسٹیانو رونالڈو بھی اس بیانیے میں شامل ہو گئے ہیں۔
