اداکارہ صائمہ قریشی نے ایک بار پھر دوسری شادی کے حوالے سے اپنے مؤقف کو دہرایا ہے اور کہا ہے کہ مردوں کو غیر ازدواجی تعلقات میں پڑنے کے بجائے نکاح کو ترجیح دینی چاہیے۔ ان کے مطابق تقریباً 95 فیصد مرد دوسری شادی کرنے کے خواہشمند ہوتے ہیں۔
انہوں نے حال ہی میں ایف ایچ ایم پوڈکاسٹ میں گفتگو کرتے ہوئے کہا کہ اگر مردوں کو افیئرز رکھنے کا شوق ہے تو بہتر ہے کہ وہ کسی کی ذمہ داری لیں، کیونکہ ایک مرد کی غلط حرکت پوری نسل کو متاثر کر سکتی ہے۔
صائمہ قریشی کا کہنا تھا کہ اگر کوئی مرد کسی کے جذبات سے کھیلتا ہے یا جھوٹے خواب دکھاتا ہے تو اسے یہ یاد رکھنا چاہیے کہ اس کی اپنی اولاد بھی پروان چڑھ رہی ہے، اس لیے بہتر یہی ہے کہ وہ غلط یا حرام تعلقات کے بجائے نکاح کرے۔
اداکارہ نے مزید کہا کہ جب مرد غیر ازدواجی تعلقات قائم کرتے ہیں تو انہیں کوئی خوف نہیں ہوتا، لہٰذا نکاح کرنے اور اپنی بیوی کو اعتماد میں لینے میں بھی ہچکچاہٹ نہیں ہونی چاہیے۔ ان کا کہنا تھا کہ انہوں نے ذاتی طور پر ایسے کئی مرد دیکھے ہیں جو اپنی دونوں بیویوں کے ساتھ خوشگوار زندگی گزار رہے ہیں۔
انہوں نے وضاحت کی کہ دین میں دوسری شادی کے لیے پہلی بیوی کی اجازت لازمی نہیں ہے، تاہم اسے آگاہ ضرور کرنا چاہیے۔ ان کے مطابق کئی خواتین ایسی بھی ہیں جو اپنے شوہروں کی دوسری شادی خود کرواتی ہیں، اور اس کی مثالیں میڈیا میں بھی دیکھی جا سکتی ہیں۔
یاد رہے کہ رواں سال فروری میں بھی صائمہ قریشی نے اسی یوٹیوب چینل کے پوڈکاسٹ میں یہی مؤقف اپنایا تھا کہ مردوں کو دوسری شادی کے لیے پہلی بیوی کی اجازت کی ضرورت نہیں اور غیر ازدواجی تعلقات رکھنے کے بجائے نکاح کرنا زیادہ بہتر ہے۔
