نمیبیا نے افریقی کوالیفائرز کے سیمی فائنل میں تنزانیہ کو آسانی سے شکست دے کر آئی سی سی مینز ٹی ٹوئنٹی ورلڈکپ 2026 کے لیے کوالیفائی کرلیا۔ یہ نمیبیا کا چوتھا بڑا ایونٹ ہوگا، اس سے قبل وہ 2021، 2022 اور 2024 کے ایڈیشنز میں بھی شرکت کرچکا ہے۔
دوسرے سیمی فائنل میں زمبابوے نے کینیا کو 7 وکٹ سے شکست دے کر ورلڈکپ میں جگہ بنالی۔ اس سے قبل یورپی کوالیفائرز میں اٹلی نے پہلی بار ورلڈکپ کے لیے کوالیفائی کر کے تاریخ رقم کی تھی جبکہ نیدرلینڈز بھی یورپ سے جگہ بنانے والی ٹیموں میں شامل ہے۔
آئی سی سی کے مطابق آئندہ سال بھارت اور سری لنکا میں ہونے والے ٹی ٹوئنٹی ورلڈکپ میں 20 ٹیمیں شریک ہوں گی۔ میزبان بھارت اور سری لنکا کے علاوہ افغانستان، آسٹریلیا، بنگلادیش، انگلینڈ، جنوبی افریقا، ویسٹ انڈیز، امریکا اور نیوزی لینڈ نے گزشتہ ورلڈکپ کے سپر ایٹ مرحلے تک رسائی کی بنیاد پر براہِ راست کوالیفائی کیا ہے۔
ان کے علاوہ پاکستان، آئرلینڈ اور نیوزی لینڈ نے رینکنگ کے ذریعے ایونٹ میں جگہ بنائی، جبکہ باقی تین ٹیموں کا فیصلہ امریکا، ایشیا اور ایسٹ ایشیا پیسیفک ریجن کے کوالیفائرز کے بعد ہوگا۔
ٹی ٹوئنٹی ورلڈکپ 2026 میں ٹیموں کی بڑی تعداد اور نئے ممالک کی شمولیت نے شائقین کرکٹ کے جوش و خروش کو مزید بڑھا دیا ہے۔
