پاکستان بھر میں آج انٹرنیٹ صارفین کو غیر معمولی سست روی یا جزوی بندش کا سامنا کرنا پڑ سکتا ہے، کیونکہ بین الاقوامی کیبل نیٹ ورک میں تکنیکی خرابی کے باعث بڑے پیمانے پر مرمتی عمل کا آغاز کیا جا رہا ہے۔
پاکستان ٹیلی کمیونیکیشن کمپنی لمیٹڈ (پی ٹی سی ایل) گروپ کے ترجمان کے مطابق یہ کام ضروری تکنیکی مرمت کے تحت کیا جا رہا ہے، جس کا بنیادی مقصد انٹرنیٹ سروس کو مستحکم بنانا اور مستقبل میں کسی ممکنہ تکنیکی مسئلے سے بچاؤ کو یقینی بنانا ہے۔
ترجمان نے مزید بتایا کہ بین الاقوامی کیبل کنسورشیم نے سمندر میں بچھائی گئی کیبل میں نصب ایک اہم رپیٹر کی مرمت کا شیڈول جاری کیا ہے، جس کے تحت آج 14 اکتوبر کو صبح 11 بجے سے مرمتی عمل کا آغاز کر دیا جائے گا۔
یہ عمل تقریباً 18 گھنٹے تک جاری رہنے کی توقع ہے۔ اس دوران ملک کے مختلف علاقوں میں انٹرنیٹ کی رفتار میں نمایاں کمی آ سکتی ہے یا سروس جزوی طور پر معطل بھی ہو سکتی ہے۔
پی ٹی سی ایل گروپ کے ترجمان کا کہنا تھا کہ یہ تکنیکی سرگرمی انٹرنیٹ نیٹ ورک کو مزید بہتر اور مستحکم بنانے کے لیے ناگزیر ہے۔ کمپنی نے اس دوران صارفین کو درپیش ممکنہ مشکلات پر معذرت کا اظہار بھی کیا ہے۔
ترجمان نے یقین دہانی کرائی کہ جیسے ہی مرمتی کام مکمل ہوگا، انٹرنیٹ سروس کو فوری طور پر بحال کر دیا جائے گا اور صارفین کو پہلے سے بہتر رفتار اور معیار فراہم کیا جائے گا۔
