کراچی سمیت صوبہ سندھ کے تمام سرکاری اور نجی تعلیمی اداروں میں موسمِ سرما کی تعطیلات کا باضابطہ اعلان کردیا گیا ہے۔
محکمہ تعلیم کی اسٹیئرنگ کمیٹی کا اجلاس کراچی میں منعقد ہوا، جس میں متفقہ طور پر فیصلہ کیا گیا کہ صوبے بھر کے اسکولوں، کالجز اور دیگر تعلیمی اداروں میں سردیوں کی چھٹیاں 22 دسمبر سے 31 دسمبر تک جاری رہیں گی۔
ترجمان محکمہ تعلیم کے مطابق یکم جنوری سے تمام تعلیمی ادارے معمول کے مطابق تدریسی سرگرمیاں دوبارہ شروع کریں گے۔ والدین، طلبہ اور اساتذہ کو ہدایت کی گئی ہے کہ چھٹیوں کے بعد کلاسز کی بحالی کے لیے اپنی تیاری یقینی بنائیں۔
مزید کہا گیا کہ موسمِ سرما کی تعطیلات کے باوجود سندھ کے امتحانی بورڈز کے تحت ہونے والے ضمنی امتحانات مقررہ شیڈول کے مطابق ہی منعقد کیے جائیں گے، اور اس سلسلے میں کسی قسم کی تبدیلی یا تاخیر کا امکان نہیں ہے۔
