اسلام آباد: پاکستان کرکٹ ٹیم کے تجربہ کار آل راؤنڈر عماد وسیم نے اپنی ازدواجی زندگی سے متعلق اہم پیش رفت سے آگاہ کرتے ہوئے عدالت میں طلاق کی درخواست دائر کرنے کا اعلان کر دیا ہے۔
سوشل میڈیا پلیٹ فارم انسٹاگرام پر جاری کیے گئے اپنے بیان میں عماد وسیم نے کہا کہ طویل غور و فکر کے بعد وہ اس نتیجے پر پہنچے ہیں کہ ان کے اور ان کی اہلیہ کے درمیان گزشتہ چند برسوں سے موجود اختلافات اب حل نہیں ہو سکتے، جس کے باعث انہوں نے طلاق کے لیے قانونی راستہ اختیار کرنے کا فیصلہ کیا ہے۔
انہوں نے عوام اور میڈیا سے اپیل کی کہ ان کی نجی زندگی کا احترام کیا جائے اور پرانی تصاویر یا افواہوں کی بنیاد پر کسی قسم کی قیاس آرائیاں نہ کی جائیں۔
عماد وسیم نے واضح کیا کہ اگر کسی نے ان کی ذاتی زندگی میں مداخلت کی یا غیر ضروری بیانیے پھیلانے کی کوشش کی تو اس کے خلاف قانونی کارروائی کی جائے گی۔
انہوں نے یہ بھی کہا کہ بچوں کی سرپرستی اور ذمہ داری کے حوالے سے وہ اپنا کردار پوری ذمہ داری کے ساتھ ادا کرتے رہیں گے۔
واضح رہے کہ عماد وسیم نے 2019 میں ثانیہ اشفاق سے شادی کی تھی اور ان کے تین بچے ہیں۔ ماضی میں میڈیا میں ان کے ازدواجی اختلافات اور مبینہ تعلقات سے متعلق خبریں گردش کرتی رہی ہیں، تاہم کرکٹر کی جانب سے ان خبروں کی نہ تو تصدیق کی گئی اور نہ ہی تردید، جبکہ ان کی اہلیہ کی جانب سے بھی سوشل میڈیا پر بعض مبہم بیانات سامنے آتے رہے، جس کے بعد اس معاملے نے عوامی توجہ حاصل کی۔
یہ اعلان پاکستان کرکٹ کے شائقین کے لیے غیر متوقع قرار دیا جا رہا ہے اور اس سے ایک بار پھر کھیل کے معروف ستارے کی نجی زندگی عوامی بحث کا موضوع بن گئی ہے۔
