کراچی: عالمی اور مقامی گولڈ مارکیٹس میں گزشتہ روز کے نمایاں اضافے کے بعد آج سونے کی قیمت میں کمی ریکارڈ کی گئی ہے، جس کے باعث قیمتیں بلند ترین سطح سے نیچے آ گئی ہیں۔
آل پاکستان جیمز اینڈ جیولرز ایسوسی ایشن کی رپورٹ کے مطابق کاروباری ہفتے کے پہلے روز پیر کو ملکی صرافہ مارکیٹوں میں سونا سستا ہوا، جس کے بعد عالمی اور مقامی سطح پر قیمتوں میں کمی دیکھنے میں آئی۔
رپورٹ کے مطابق ملک میں آج 24 قیراط کے حامل ایک تولہ سونے کی قیمت میں 5500 روپے کی کمی ہوئی ہے، جس کے بعد فی تولہ سونے کی قیمت 4 لاکھ 70 ہزار 162 روپے پر آ گئی ہے۔
اسی طرح آل پاکستان جیمز اینڈ جیولرز ایسوسی ایشن کے مطابق 10 گرام سونے کی قیمت میں بھی 4715 روپے کی کمی ریکارڈ کی گئی ہے، جس کے بعد 10 گرام سونا 4 لاکھ 03 ہزار 088 روپے میں فروخت ہو رہا ہے۔
دوسری جانب بین الاقوامی مارکیٹ میں سونے کی قیمت 55 ڈالر کمی کے بعد 4478 ڈالر فی اونس کی سطح پر آ گئی ہے۔
رپورٹ میں مزید بتایا گیا ہے کہ ملک میں چاندی کی قیمتوں میں بھی کمی دیکھی گئی ہے، جہاں فی تولہ چاندی 332 روپے سستی ہو کر 8 ہزار 075 روپے تک آ گئی، جبکہ 10 گرام چاندی کی قیمت 284 روپے کم ہو کر 6 ہزار 923 روپے ہو گئی ہے۔
یاد رہے کہ گزشتہ کاروباری ہفتے کے آخری روز ہفتے کو ملک میں سونے کی فی تولہ قیمت میں 2300 روپے کا نمایاں اضافہ ہوا تھا، جبکہ عالمی منڈی میں سونا فی اونس 23 ڈالر مہنگا ہوا تھا۔
