محکمۂ موسمیات نے کراچی میں سردی کی شدت میں نمایاں اضافے کی پیش گوئی کرتے ہوئے شہریوں کو آئندہ چند دنوں کے دوران شدید اور خشک موسم کے لیے خبردار کر دیا ہے، جس کے باعث روزمرہ زندگی متاثر ہونے کا امکان ظاہر کیا جا رہا ہے۔
ماہرینِ موسمیات کے مطابق شہر قائد ایک بار پھر ٹھنڈی اور خشک ہواؤں کی لپیٹ میں آنے والا ہے، جس کے نتیجے میں درجۂ حرارت میں واضح کمی ریکارڈ کی جا سکتی ہے اور موسم غیر معمولی طور پر سرد محسوس ہو سکتا ہے۔
محکمۂ موسمیات کے ترجمان انجم نذیر ضیغم کا کہنا ہے کہ 6 جنوری سے بلوچستان کی جانب سے سرد اور انتہائی سرد شمال مشرقی ہوائیں کراچی کا رخ کریں گی، جو شہر میں سردی کی ایک نئی لہر کو جنم دیں گی۔ انہوں نے بتایا کہ ان ہواؤں کے باعث نہ صرف موسم خشک ہو جائے گا بلکہ رات اور صبح کے اوقات میں سردی کی شدت میں غیر معمولی اضافہ متوقع ہے۔
محکمۂ موسمیات کے مطابق اس سرد لہر کے نتیجے میں کراچی کا کم سے کم درجۂ حرارت سنگل ڈیجٹ میں ریکارڈ ہونے کا امکان ہے، جبکہ پارہ 8 ڈگری سینٹی گریڈ تک گر سکتا ہے۔ ماہرین کا کہنا ہے کہ اگر ہواؤں کی رفتار میں اضافہ ہوا تو سردی کا احساس درجۂ حرارت سے بھی کہیں زیادہ ہو سکتا ہے۔
موسمیاتی ماہرین نے شہریوں کو احتیاطی تدابیر اختیار کرنے کا مشورہ دیتے ہوئے کہا ہے کہ بالخصوص بچے، بزرگ اور بیمار افراد سردی سے بچاؤ کے لیے مناسب گرم لباس کا استعمال یقینی بنائیں، جبکہ رات کے اوقات میں غیر ضروری طور پر باہر نکلنے سے گریز کیا جائے۔ محکمۂ موسمیات کا کہنا ہے کہ آئندہ چند روز تک موسم کی صورتحال پر مسلسل نظر رکھی جا رہی ہے اور کسی بھی ممکنہ تبدیلی سے عوام کو بروقت آگاہ کیا جائے گا۔
