بھارت کے معروف گلوکار اریجیت سنگھ نے پلے بیک سنگنگ سے ریٹائرمنٹ کا اعلان کر دیا ہے، جس نے موسیقی کے شائقین اور مداحوں کو حیران کر دیا۔ اریجیت سنگھ کی جانب سے یہ اعلان اچانک سامنے آیا، جس کے بعد سوشل میڈیا اور موسیقی کی دنیا میں اس پر بھرپور ردِعمل دیکھنے میں آ رہا ہے۔
اریجیت سنگھ نے پلے بیک سنگنگ سے کنارہ کشی کا اعلان اپنے انسٹاگرام اکاؤنٹ پر ایک جذباتی پیغام کے ذریعے کیا، جس میں انہوں نے اپنے مداحوں کی طویل عرصے سے ملنے والی محبت اور حمایت پر اظہارِ تشکر کیا۔ انہوں نے پیغام میں لکھا کہ وہ گزشتہ برسوں کے دوران مداحوں کی جانب سے ملنے والی محبت کے لیے دل سے شکر گزار ہیں۔
اپنے پیغام میں اریجیت سنگھ نے کہا کہ وہ خوشی کے ساتھ یہ اعلان کر رہے ہیں کہ اب وہ پلے بیک گلوکار کے طور پر کوئی نیا کام نہیں کریں گے اور اس سفر کو یہیں ختم کر رہے ہیں، جبکہ ان کے مطابق یہ ایک شاندار اور یادگار سفر رہا ہے۔
ان کے اس اعلان کے بعد سوشل میڈیا پر مداحوں کی جانب سے شدید ردِعمل سامنے آیا، جہاں کئی صارفین نے حیرت اور افسوس کا اظہار کیا۔ ایک صارف نے تبصرہ کرتے ہوئے کہا کہ اریجیت سنگھ کو چاہیے کہ وہ بتائیں کہ ان کا اکاؤنٹ ہیک ہو گیا ہے، جبکہ ایک اور صارف نے لکھا کہ بالی وڈ موسیقی اریجیت سنگھ کے بغیر خالی محسوس ہوتی ہے۔
بھارتی میڈیا رپورٹس کے مطابق اریجیت سنگھ نے اپنے اس فیصلے کی وجوہات یا مستقبل کے منصوبوں کے حوالے سے کوئی وضاحت نہیں دی، جس کے باعث مداحوں میں مزید تجسس پایا جا رہا ہے۔
واضح رہے کہ اریجیت سنگھ نے بالی وڈ کو کئی یادگار اور روح کو چھو لینے والے گانے دیے، جنہوں نے انہیں موسیقی کی دنیا میں منفرد مقام دلایا۔ فلم عاشقی 2 کا گانا تم ہی ہو ان کی پہچان بنا، جبکہ چنّا میرےیا، پھر بھی تم کو چاہوں گا اور ہوائیں بھی ان کے مقبول گانوں میں شامل ہیں۔
اریجیت سنگھ دو نیشنل فلم ایوارڈز اپنے نام کر چکے ہیں، جبکہ 2025 میں انہیں پدم شری کے اعزاز سے بھی نوازا گیا۔
