بھارت میں نیپاہ وائرس کے پھیلاؤ کے بعد محکمہ صحت سندھ نے احتیاطی ایڈوائزری جاری کر دی ہے، جس میں عوام اور طبی اداروں کو محتاط رہنے کی ہدایت کی گئی ہے۔ محکمہ صحت کے مطابق یہ وائرس جانوروں سے انسانوں اور انسانوں سے انسانوں میں منتقل ہو سکتا ہے، تاہم اب تک پاکستان میں نیپاہ وائرس کا کوئی کیس رپورٹ نہیں ہوا۔
ایڈوائزری میں بتایا گیا ہے کہ نیپاہ وائرس مختلف وجوہات کی بنا پر پھیل سکتا ہے، جبکہ اس کی ابتدائی علامات میں بخار، سر درد، کھانسی، جسم میں درد اور الٹی شامل ہیں۔ محکمہ صحت نے عوام کو ہدایت کی ہے کہ اگر ان علامات میں سے کوئی ظاہر ہو تو فوری طور پر طبی مشورہ حاصل کریں اور احتیاطی تدابیر اختیار کریں۔
محکمہ صحت سندھ کا کہنا ہے کہ صورتحال پر مسلسل کڑی نظر رکھی جا رہی ہے اور صوبے بھر کے تمام سرکاری و نجی اسپتالوں کو الرٹ کر دیا گیا ہے۔ حکام کے مطابق وفاقی وزارت صحت کی جانب سے جاری کردہ گائیڈ لائنز پر مکمل عملدرآمد کو یقینی بنایا جا رہا ہے تاکہ کسی بھی ممکنہ خطرے سے بروقت نمٹا جا سکے۔
