قومی کرکٹ ٹیم کے آل راؤنڈر شاداب خان نے اعتماد کا اظہار کرتے ہوئے کہا ہے کہ ٹیم کا ہدف صرف آئی سی سی ٹی ٹوئنٹی ورلڈ کپ کے سیمی فائنل تک رسائی نہیں بلکہ فائنل کھیلنا ہے، اور کھلاڑی اسی عزم کے ساتھ میدان میں اتر رہے ہیں۔
سوشل میڈیا پر گردش کرنے والی ایک ویڈیو میں ایک صحافی نے ان سے سوال کیا کہ کیا ٹیم سیمی فائنل تک ہی محدود رہے گی؟ اس پر شاداب خان نے پُراعتماد لہجے میں جواب دیا کہ ٹیم کا ارادہ سیمی فائنل تک محدود رہنے کا نہیں بلکہ فائنل تک پہنچنے کا ہے، اور اس کے لیے بھرپور محنت کی جا رہی ہے۔
یاد رہے کہ ٹورنامنٹ کے ایک اہم میچ میں پاکستان کو بھارت کی قومی کرکٹ ٹیم کے ہاتھوں 61 رنز سے شکست کا سامنا کرنا پڑا تھا، جس کے بعد ٹیم کی پوزیشن مزید دباؤ کا شکار ہو گئی۔
پاکستان اپنا آخری گروپ میچ 18 فروری کو نمیبیا کی قومی کرکٹ ٹیم کے خلاف کھیلے گا۔ یہ مقابلہ غیر معمولی اہمیت اختیار کر چکا ہے کیونکہ سپر ایٹ مرحلے میں رسائی کے لیے پاکستان کو ہر صورت یہ میچ جیتنا ہوگا، اور کسی بھی لغزش کی صورت میں اگلے مرحلے تک پہنچنا مشکل ہو سکتا ہے۔
